Aktorja e njohur Kristen Stewart ka luajtur rolin e Princeshës së Wellsit në filmin “Spencer” dhe aktorja ka rrëfyer në një intervistë për “LA Times” se gjatë xhirimeve ajo është ndjerë sikur Diana po përpiqej të depërtonte tek ajo.

Stewart tha se kishte përjetuar disa “ndjenja drithëruese, shpirtërore duke xhiruar këtë film”, i cili zhvillohet në tre ditë gjatë pushimeve të Krishtlindjeve të vitit 1991, kur Diana po qëndronte në shtëpinë në Sandringham.

“Edhe nëse thjesht fantazoja, ndjeva se kishte momente kur mora një lloj shenjë”- tregon aktorja për “LA Times”.

“E ndjeva kaq të gjallë Dianën kur po bëja këtë film, edhe nëse ishte gjithçka një fantazi e imja. Por kishte momente kur trupi dhe mendja ime harronin që ajo kishte vdekur. Ishte… një luftë për ta mbajtur atë gjallë çdo ditë dhe t’i kujtoja vetes se ajo kishte vdekur ishte thjesht e dhimbshme. Më shkatërroi vazhdimisht. Dhe kjo vetë ndihej shumë shpirtërore. Ishte e çuditshme. Dhe e mahnitshme. Unë kurrë nuk kam ndjerë diçka të tillë në jetën time”, ka treguar Kristen.