Erion Kristo: Nuk mësojmë nga gabimet. Shtetit nuk i plas fare!

Që prej ditës së djeshme shoqëria shqiptare është e shokuar nga vrasja e tmerrshme e fëmijës 8-vjeçar në Fier. I ftuar në emisionin “Shqip” nga Dritan Hila në “Dritare TV”, gazetari Erion Kristo është shprehur se ngjarje të tilla nuk parandalohen me polici pasi sipas tij individë si autori i krimit makabër janë me dhjetëra e mijëra në vendin tonë dhe edhe pse na ndodhin shpesh të tilla ngjarje, prapë nuk mësojmë dhe shteti nuk bën asgjë.

“Si ky individ janë me dhjetëra e mijëra dhe kjo duket pasi kemi raste të tilla plot. Roja i shkollës abuzon me nxënësen, drejtori po ashtu dhe shumë raste të tjera. Monstruoziteti është përhapur në masë në këtë shoqëri. Këtu ka lëvizur shtylla kurrizore dhe shtylla kurrizore e një kombi është kultura. Nuk parandalohen të tilla ngjarje vetëm me polici. Çalojnë institucionet në këtë vend. Të mësojmë nga gabimet tona. Kemi mësuar ndonjë herë nga gabimet tona? Shkurt shtetit nuk i plas, kanë ndodhur edhe më parë dhe asgjë nuk ka bërë shteti, nuk është bërë asgjë për t’i parandaluar. Është shumë vonë ta vrasësh atë, iku fëmija. Nuk është zgjuarsi të thuash të kthejmë dënimin me vdekje.”, u shpreh gazetari Erion Kristo.