Aktualitet
Disa lajme me Balil e me Xhelil dhe një ping-pong autorësie
Shpërthen kriza PS-LSI, Kokëdhima: Balilët janë me LSI-në
Ashtu siç e paralajmëroi gazeta Mapo, duket se marrëdhëniet mes PS dhe LSI po ndizen gjithmonë e më shumë.
Ish-deputeti socialist, Koço Kokëdhima shkruan në FB se Klemend Balili, i akuzuar si Eskobar i Ballkanit, nuk ka lidhje me të dhe me PS-në, por me LSI-në.
“Nga dita që unë hyra në politikë 3 vjet më parë, Saliu ka bërë 1004 shpifje për mua. Kam ngarkuar dy persona ti numërojne, dokumentojnë dhe publikojnë në një botim të posaçëm shpifjet më të paimagjinueshme të këtij maskarai . Dje në Parlament Saliu tha, se Klemet Balili është emëruar nga Kokëdhima në detyrën e drejtorit të shfrytëzimit të automjeteve në Sarandë. Ai gjithashtu tha, se gjoja Klement Balili është I afërt me mua dhe se ka finacuar Partinë Socialiste në zgjedhjet e qershorit të 2013. Kjo përbën shpifjen e Saliut nr. 1004. Kurrë nuk e kam njohur Klement Balilin, kurrë nuk e kam takuar apo biseduar me këtë njeri. Jam parë me të vetëm në inaugurimin e Hotelit tek ish-Kampi i Punëtorëve në Sarandë, ku kam qenë së bashku me Kryetarin e Parlamentit, Ministrin Ahmetaj dhe nje grup deputetësh, Kryetarë të Bashkive, drejtues të shtypit e gazetarë. Balili nuk është propozuar dhe as emëruar si drejtor i KSHA Sarandë as nga unë dhe as nga Partia Socialiste. Ai, në këtë detyrë është propozuar dhe vendosur nga LSI. Që nga majii 2013, që unë jam në politikë dhe asnjëhërë tjetër me parë, Balilajt nuk e kanë mbështetur Partinë Socialiste as finaciarisht, as materialisht dhe në asnjë formë tjetër. Nga Balilajt, unë njoh prej një viti Rigels Balilin, qysh nga qershorit i 2015. Rigelsi u vendos nga LSI si kandidaturë për kryetar të bashkisë së Delvinës. Me Kryetarin e Bashkisë së Delvinës, Rigels Balili, unë kam ruajtur kontakte dhe komunikim shumë të mirë, si me gjithë kryetarët e tjerë të Bashkive në Qarkun Vlorë-Gjirokastër, ku unë punoj. Kam takuar 3-4 herë edhe Bako Balilin, kordinatorin e LSI për rrethin e Delvinës, kryesisht gjatë fushatës elektorale të 2015. Përpara vitit 2013, Balilajt nuk kanë qenë kurrë me Partinë Socialiste. Ata kanë qenë mbështetës të shpallur të Partisë Demokratike të Sali Berishës. Shpifja nr. 1004 e Saliut ndaj meje dje në Parlament, fakteqsisht nuk u demaskua nga qeveritarët e deputetët e Partisë Socialiste, që i njohin plotësisht të vërtetat, që unë shpjegova më lart, siç i dinë edhe të gjithë banorët në Sarandë dhe Delvinë,” shkruan Kokëdhima.
Rikthehet kriza PS-LSI: ‘Xhelili’, ‘aksidenti i 2 fëmijëve’ dhe ‘Balili’
Në një kohë kur kryetari i LSI, Ilir Meta ndodhet në Uashington dhe në Tiranë kanë nisur spekulimet se cili do jetë pozicioni i forcës së tij politikë në zgjedhjet që pritet të zhvillohen pas thuajse një vit, duket se kriza mes PS dhe LSI është rikthyer.
Një deputet i LSI i kërkoi kryeministrit Edi Rama të kërkojë falje për kandidaturën e Shukri Xhelilit si kryebashkiak i Dibrës.
Një tjetër fushë beteje duket se është ajo se pranë cilës forcë politike është më shumë Klement Balili, i etiketuar si Eskobari i Ballkanit.
Ndërsa një pikë tjetër përplasje mes aleatëve ka lidhje me aksidentin e para disa ditëve në Kavajë.
Mediat kanë raportuar se pika e karburantit, e cila u bë shkak që barrierat e rrugës të ishin të hapura, duke sjellë aksidentin, ishte në pronësi të Pilo Kërit, babai i Krislen Kërit, shefit aktual të kabinetit të Ministrit të Transporteve, Edmond Haxhinasto.
Kurse Top Channel raporton se kompania që kishte në pronësi karburantin, kishte marrë me tender edhe mirëmbajtjen e këtij aksi rrugor.
Si për të shtuar akoma benzinë në zjarr, ditën kur ka nisur mbyllja e kësaj hapësire, deputeti socialist, Erion Braçe shkruan se “po mbyllet hapësira e krimit, e lënë e tillë nga një interes privat mbështetur në rrugë korruptive!”
Deputeti i LSI: Rama të kërkojë falje për Xhelilin
Deputeti i Lëvizjes Socialiste për Integrim, Përparim Spahiu për mikrofonin e Ora News kërkoi nga kryeministri Edi Rama që të kërkojë ndjesë publike që ka propozuar për kryetar bashkie në Dibër, Shukri Xhelilin.
“Ajo që dua të theksoj se fakti që është shkarkuar duhet të shoqërohet edhe me një kërkesë falje nga ata që e propozuan një kandidaturë të tillë për popullin e Dibrës, kryeministri dhe të gjithë ata që e propozuan”.
Përparim Spahiu është një prej deputetëve të LSI në Dibër, i cili pak muaj më parë denoncoi faktin se ish-kryebashkiaku Shukri Xhelili nuk pranon të komunikojë as me qytetarët, por as me deputetët e kësaj zone./MAPO
Duhet të jeni i kyçur në mënyrë që të mund të lini një koment Kyçu