Inspektoriati Kombëtar i Mbrojtjes së Territorit ka nisur aksionin për shembjen e banesave në zonën e “5 Majit”, Tiranë. Në orët e para të mëngjesit në këtë zonë u shkëput energjia elektrike dhe më pas mbërritën forca të shumta policie.

Këta të fundit bllokuan qarkullimin në këtë zonë dhe shoqëruan disa prej banorëve të cilët kundërshtuan shembjen e shtëpive. Banesat do të prishen në kuadër të procesit të rindërtimit, por banorët nuk janë dakord.

Policia ka nxjerrë me forca të tjerë banorë që refuzuan të dilnin nga shtëpitë e tyre, ndërsa makinat janë hequr me karrotrec. Janë më shumë se 400 banesa që pritet të shemben, ndërsa ditën e sotme do të prishen tre shtëpi.

Banorët janë shprehur të revoltuar për mediat, duke thënë se nuk kanë ku të qëndrojnë. I pyetur nga mediat se ku do të qëndrojnë, një prej banorëve të zonës tha: Jashtë, në Hënë. Unë kam pasur shtëpi. Ose te shtëpia e Erion Veliajt. Jam me vëlla, me grua, me nënë.

Ndërkohë një tjetër banore e revoltuar u shpreh se qeveria është kriminale, ndërsa hodhi akuza ndaj kryeministrit Edi Rama dhe kryebashkiakut të Tiranës Erion Veliajt.

“Kjo qeveri kriminale me në krye Ramën e Erion Veliajn. Zemra më plastë e jetën mos e gëzofshin, ky është shtet hajdut e tradhëtar. Ky shtet të vret natën!

Djemte e mi kanë punu gjithë jetën, po më ndalet fryma. E mjera Shqipëri kë ka në krye, rroft Turqia e Serbia. Turp, turp, turp! Në botë nuk ka ndodh te ne, ça bëhet kështu? Të më kapin zvarrë mua”, tha ajo.