Kontratat e inceneratorëve dhe dyshimet se pas tyre qëndron një aferë e madhe korruptive janë kthyer në fokusin e debatit politik. Prej disa ditësh Komisioni Hetimor për këtë çështje ka thirrur për të dëshmuar zyrtare të lartë të qeverisë.

Një raport i treguar dje nga kryetarja e këtij komisioni, Jorida Tabaku ngre dyshime se qeveria ka qenë në dijeni të abuzimeve me paratë për inceneratorin e Elbasanit.

Tabaku tregoi se në 2 qershor të vitit 2020, ministria e Financave e drejtuar asokohe nga Anila Denaj kishte firmosur nisjen e një inspektimi financiar për këtë kontratë koncesionare, nisur nga dyshimet për korrupsion.

Gjetjet e këtij inspektimi financiar nuk janë bërë publike dhe nuk i janë i vendosur në dispozicion komisionit që po merret me hetimin e kësaj çështjeje.

“Kam një vendim nga Ministria e Finacave për fillimin e inspektimit financiar për Inceneratorin e Elbasanit. Ky vendim i 02.06 2020 vendos të fillojë inspektimi financiar bazuar mbi dyshimin për keqmenaxhim të rëndë financiar, vjedhjes, mashtrimit, shkatërrimit të pronës, etj”, tha Tabaku.

Ndërkohë Denaj, e cila është dhe pjesë e komisionit, nuk mohoi gjetjen e shkeljeve në kontratën koncesionare të inceneratorit të Elbasanit, por tha se ka elementë që vlejnë për t’u diskutuar, duke shtuar dyshimet më tej dyshimet.

“Së pari ky inspektim financiar duhet të vihet në dijeni të të gjithë anëtarëve të komisionit në kohën e duhur. Aty do shikoni që po ka elementë për të cilët duam të diskutojmë dhe të shohim nëse ato gjetje duhet të shkojnë te organi i akuzës”, tha Denaj.