Koment nga Respublica.al

E krijoi edhe Basha disidencën e tij

Mediat kanë raportuar për një mbledhje të forumeve kryesore të PD-së gjatë së cilës është debatuar. Madje disa deputetë I kanë kërkuar Lulzim Bashës të japë dorëheqjen pas rezultatit të zgjedhjeve të pjesshme të 6 marsit. 
Sigurisht që nuk ka asnjë logjikë të mbështesë më z. Basha në pozitën e tij të tanishme. Zotit Basha i kanë shteruar edhe alibitë, teksa siç rapotohet i ka quajtur zgjedhjet e fundit si kurth. Këtë padyshim nuk e beson as vetë zotëria. 

Kryelajmi i disidencës së re brenda PD-së, ishte dorëheqja e Agron Gjekmarkaj, bërë aty ku ky i fundit di të shkëlqejë: në Facebook. Ky akt do marrë me rezervë, sepse dorëheqje të tilla janë një status që mund të fshihet e mandej të mohohet. Jetojmë në kohë e defiçitit të madh të seriozitetit, mall ky fare pa kërkesë në anët tona. 
Vijnë pastaj me radh emrat e atyre që kërkojnë dorëheqje. Parimisht e drejtë.

Por ne duhet të pyesim: çfarë mbështetën këta zotërinj kur shkuan pas një njeriu që me vullnet personal, doli në media e njoftoi përjashtimin e një anëtari të partisë, pa u konsultuar me askënd? Cili parim, cila e drejtë, cili kod e justifikon këtë? 
Asgjë. E mbështet vetëm oportunizmi i disa njerëzve që deri më dje i jargaviteshin gjithë adhurim të rremë z. Basha me apelin: Udhëhiq, kurse sot janë kujtuar të flasin për shqiptarët e zhgënjyer. 
Lulzim Basha nuk ekziston më politikisht. As në korridoret e selisë ku mund të hyjë e të dalë, por thjesht si vizitor të cilin e shoqëron vetëm hija.

Mirëpo përtej këtij momenti të cilin nuk po do ta besojë ndoshta edhe ndonjë ambasadë në Tiranë, çështja shtrohet te kredibiliteti i fytyrave të vrerosura të PD-së sot, të cilët nëse nuk kishin kuptuar se po shkonin në theqafje pikërisht se askush nuk i merr seriozisht, atëherë nuk kanë lidhje me politikën. Me shoqërinë ku jetojnë, me kërkesat e saj. 

Ajo parti ka humbur rrugën, qëllimin dhe funksionimin. Ajo është një hapësirë e zënë në anë të Lanës nga disa njerëz që duhet të largohen sepse kanë tetë vjet që i mungojnë apelit të interesit publik në Shqipëri.

Metoda dhe mekanizmi me të cilin duhet realizuar kjo është një formalitet që nëse nuk e vë në lëvizje vullneti politik, do ta bëjë vota që mund ta shumëzojë me zero këtë 6% e tanishëm.

Është e udhës që të mos arrihet deri në këtë poshtërim I cili emancipohet vetëm kur e asocion me Lulzim Bashën, por me asnjë interes sado malinj.

Oxhaku i asaj ngrehine ka rënë dhe shtëpia e opozitarizmit duhet rithemeluar pa u kufizuar në emra, sigla e logo që nuk thonë më asgjë, kushdo që t’i marrë në kontroll.