Unë protestoj kundër protestuesve që presin derisa sakatosen për të ngritur zërin.

Koment nga Erjon Saliasi

Po shikoj zhvillimin e protestave në televizor (do thoni ju pse nuk je në protestë.

Unë mendoj që protesta ime është bërë te votimet).

1. Më bën përshtypje që sllogani mbizotërues është “Rama ik!”. Po mirë ja iku Rama, cili do ia zërë vendin? Me sa kam parë s’ka dalë njeri të thotë po iku Rama, do vij unë dhe do ul çmimet.

2. Duke qenë se sllogani që përmenda më sipër është “Rama ik!”, jam kurioz a janë të gjithë opozitarë këta që kanë dalë në shesh? Mirë do ishte të ishin pozitarë, njerëz që ia dhanë votën Ramës. Nëse Rama ka përgjegjësi për situatën sot, po aq përgjegjës janë ata që e votuan. Të shkojnë në shesh dhe të mos thonë Rama ik por të thone Rri! Rri dhe respekto votën që ke marrë duke mbrojtur shqiptarët.

Unë nuk protestoj, jo sot, jo për naftën. Nafta është normale të jetë në të njëjtin çmim si p.sh në Luksemburg, se nuk do ia shesin Shqipërisë më lirë sepse i paska shqiptarët e varfër…

Unë protestoj kundër protestuesve që presin derisa sakatosen për të ngritur zërin. Unë do protestoj kur njerëzit të ankohen për gerryerjen e përditshme të dinjitetit të shqiptarit: rroga të ulëta, shërbime të dobëta, meritokraci e vdekur, mundësi gati zero për zhvillim personal e profesional, krim i paluftuar, etj etj.

Nëse këto më sipër shkojnë në nivelin ku duhet të jenë, nëse nafta është 2 euro e ca dhe rroga mesatare 2000-3000 euro në muaj, atëherë dhe vetëm atëherë do protestoj për rritje çmimi.

Do protestoj sepse, me dinjitetin e rivendosur, do bëj detyrën time qytetare të aplikimit të kulturës së protestës që lind natyrshëm në shtet funksional./ Podiumi.com