Mbrëmjen e kësaj të diele u zhvillua edicioni i 94-t i çmimeve Oscar 2022, ku triumfoi filmi “Coda”. Krahas tre prezantueseve, Wanda Sykes, Regina Hall e Amy Schumer, të shumtë ishin yjet e botës së kinemasë e të muzikës që u ngjitën në skenë.

Mbrëmja e madhe u hap me një performancë të një prej yjeve më të mëdhenj të muzikës botërore, pikërisht me Beyonce. Venus dhe Serena Williams ishin prezantueset e para në skenë, të cilat prezantuan performancën e këngëtares 40-vjeçare.

Beyonce dha një performancë të fuqishme të “Be Alive” nga kandidati për “Filmin më të mirë”, “King Richard”, të cilin ajo e shkroi bashkë me Dixson.

Vajza e këngëtares, 10-vjeçarja Blue Ivy, gjithashtu u pa me nënën e saj, duke mbajtur syze dielli dhe duke qëndruar përballë Beyonce-s për një pjesë të performancës.

Vetë Beyonce ishte e veshur me një fustan jeshil neon me pantallona të shkurtra dhe taka në ngjyrë të ngjashme. Ajo kishte vendosur si aksesorë një palë vathë diamanti me shkëlqim ndërsa kërcimtarët e saj kishin veshje të përshtatura me këngëtaren.