PD e ka provuar këtë eksperiment në fillim të viteve 2000

Andi Bushati

Po të shohësh qëndrimin e qartë të zyrtares së lartë amerikane, ai nuk ndryshon aspak nga ato që vendi i saj ka mbajtur para përjashtimit të Berishës nga Basha, para kuvendit të 11 dhjetorit, para përplasjes fizike të 9 janarit dhe para zgjedhjeve të pjesshme lokale të 6 marsit.

Por në të gjitha këto përballje, Berisha ka dalë i më fituar dhe grupi i atyre që vetëquhen si “pro amerikanë” në PD, gjithnjë e më i tkurrur në vota dhe më i zvogëluar në numra.

Edhe historikisht kjo nuk është një dukuri e re në gjirin e kësaj partie të djathtë.

PD e ka provuar këtë eksperiment në fillim të viteve 2000 kur prej saj doli PDR e Pollos. Mbështetja e amerikanëve qe e madhe.

Si pasojë e saj edhe ajo e qeverisë Meta dhe mediave që në atë kohë kontrolloheshin nga socialistët. Atëhere u shkua deri aty sa PD-së zyrtre t’i vidheshin simbolet për të konkuruar në zgjedhje. Por rezultati afatgjatë ishte i papërfillshëm.

E njëjta fabul u përsërit edhe pas djegjes së mandateve. Amerikanët thanë se opozita reale e vendit është ajo e Murrizit dhe Rudina Hajdarit, u sollën me sikur dhe i bënë ata pjesë të sistemit, por në fund, kur i hodhën para elektoratit, e panë sesa qesharake ishte butaforia e një opozite që edhe në qoftë pro amerikane, nuk ka asnjë vlerë kur është fallco.

Ky mallkim i kthimit të shpinës ndaj zgjedhësve, për t’u konformuar me tekat e diplomatëve, rrezikon të përsëritet si një leksion i pamësuar edhe mbi Bashën, Alibeajn, Bardhin, Tabakun e me radhë.