Ylli zviceran Roger Federer ka njoftuar tërheqjen nga tenisi.

41-vjeçari nuk ka konkurruar që nga Wimbledon në korrik 2021. Ai ka bërë një sërë operacionesh në gju.

Federer postoi lajmin në Twitter, duke thënë se eventi i lamtumirës do të jetë Laver Cup në Londër javën e ardhshme.

“Siç e dini shumë prej jush, tre vitet e fundit më janë paraqitur sfida në formën e lëndimeve dhe operacioneve. Kam punuar shumë për t’u rikthyer në formën e plotë konkurruese. Por gjithashtu i njoh kapacitetet dhe kufijtë e trupit tim dhe mesazhi i tij për mua kohët e fundit ka qenë i qartë. Jam 41 vjeç. Kam luajtur më shumë se 1500 ndeshje gjatë 24 viteve. Tenisi më ka trajtuar më bujarisht sesa do të kisha ëndërruar ndonjëherë, dhe tani duhet të kuptoj se kur është koha për t’i dhënë fund karrierës sime”.