Ndërsa Amerika nderon trashëgiminë e Dr.Martin Luther King, ekspertët thonë se lufta e tij kundër varfërisë dhe pabarazisë është ende po aq e rëndësishme edhe sot, sa ishte gjatë lëvizjes amerikane për të drejtat civile.

BBC rendit 10 fakte pak të njohura për jetën dhe trashëgiminë e Martin Luther King.

Fjalimi “Unë kam një ëndërr” ishte i improvizuar

Në gjysmë të fjalës së tij në vitin 1963, këngëtari i ungjillit, Mahalia Jackson, i bërtiti: “Thuaju atyre për ëndrrën, Martin!”

Thirrja e shtyu Kingun t’i drejtohej një predikimi të mëparshëm që ai kishte mbajtur, ku ai përshkroi një version të ëndrrës amerikane që ishte e barabartë dhe e arritshme për të gjithë qytetarët.

“Unë kam një ëndërr që katër fëmijët e mi të vegjël një ditë do të jetojnë në një komb ku nuk do të gjykohen nga ngjyra e lëkurës së tyre, por nga përmbajtja e karakterit të tyre. Unë kam një ëndërr sot,” tha ai.

Momenti ikonë më vonë do të bëhej i njohur si fjalimi “Unë kam një ëndërr”. Dhe ka ende punë për të bërë për të përmbushur me të vërtetë ëndrrën e Martin Luter King.

Emri i tij i lindjes ishte Michael King

Kur lindi më 15 janar 1929, ai mori emrin e babait të tij, Michael King. Por gjashtë vjet më vonë, babai i King vizitoi Gjermaninë dhe mësoi për Martin Luterin, udhëheqësin e reformimit protestant.

Thuhej se ai ishte aq i frymëzuar sa u kthye në shtëpi dhe ndryshoi zyrtarisht emrin e tij dhe të djalit të tij të madh në Martin Luther King.

King vendosi të bëhej predikues në kolegj

Në vitin 1944, Martin Luther King u ​​pranua në Kolegjin Morehouse në moshën 15-vjeçare. Brezat e familjes King ishin diplomuar nga kolegji prestigjioz historikisht për njerëzit me ngjyrë, tërësisht meshkuj, në Atlanta, Georgia.

Sipas Institutit King, udhëheqësi i ardhshëm i të drejtave civile thuhej se kishte qenë një student “i zakonshëm”, por koha e tij në Morehouse ishte e rëndësishme në zgjimin e pasionit të tij për barazinë sociale dhe politike dhe e frymëzoi atë të bëhej predikues.

Ai u arrestua më shumë se 25 herë

Në 13 vitet e tij si udhëheqës i të drejtave civile, King u arrestua 30 herë, kryesisht për kundërvajtje dhe shkelje të protestave civile, sipas King Center. Edhe pse ai ishte shpesh një objektiv i zbatimit të ligjit, atij nuk i pëlqente burgosja.

Ai u arrestua në tetor 1960 pas një proteste në një dyqan në Atlanta dhe u mbajt në burgun shtetëror të Xhorxhias. Ai i shkroi gruas së tij, Coretta-s, nga burgu duke thënë se shpresonte se “vuajtjet e tepërta që po i vijnë tani familjes sonë do të shërbenin në një farë mënyre për ta bërë Atlantën një qytet më të mirë, Xhorxhian një shtet më të mirë dhe Amerikën një vend më të mirë”.

Ai shkroi pesë libra

King shkroi pesë libra gjatë jetës së tij dhe botoi koleksione të shumta të letrave dhe predikimeve të tij.

Libri i tij i vitit 1964, “Pse nuk mund të presim”, rrëfente ngjarjet që çuan në fushatën historike të Birminghamit, Alabama, për t’i dhënë fund ndarjes racore.

Ai ishte një Trekkie

Nichelle Nichols, e njohur më mirë si Lt Nyota Uhura origjinale në Star Trek, u prezantua dikur me dikë që pretendonte se ishte ” fansi i saj më i madh” dhe ai ishte Martin Luther King. Nichols kishte dhënë dorëheqjen nga roli i saj novator në Star Trek ditë më pare kur ata u takuan në një ceremoni çmimesh.

Aktorja ka rrëfyer se ajo që i tha King bëri që ajo të mos ikte nga roli. “King më tha: ‘Për herë të parë në televizion do të shihemi ashtu siç duhet të shihemi çdo ditë, si njerëz inteligjentë, cilësorë, të bukur… që mund të shkojnë në hapësirë’, kujton Nichols. “Unë thjesht qëndrova aty duke kuptuar se çdo fjalë që ai thoshte ishte e vërtetë. Në atë moment, bota u anua për mua.” Ajo do të vazhdonte këtë rol për vite me radhë.

Ai i mbijetoi atentateve të mëparshme

Në shtator të vitit 1958, një grua me probleme mendore iu afrua Kingut teksa ai nënshkroi kopjet e librit të tij më të fundit, “Hapi drejt lirisë”, në Harlem. Gruaja pasi u bind se ai ishte vërtetë Martin Luther King, e qëlloi atë me një thikë shtatë inç të gjatë

Në atë kohë, mjekët thanë se ai ishte “një grahmë larg vdekjes”, sepse thika ishte shumë afër aortës së tij. Pasi mësoi se gruaja ishte e sëmurë mendërisht, King tha: “Unë nuk kam asnjë inat ndaj saj” dhe bëri thirrje që ajo të merrte trajtim.

Nëna e tij Alberta, u vra po ashtu pas vdekjes së tij

Më 30 qershor 1974, gjashtë vjet pas vrasjes së King, një burrë 23-vjeçar qëlloi dhe vrau nënën e tij, Alberta Ëilliams King, ndërsa ajo po luante në organo gjatë një shërbimi në Kishën Baptiste Ebenezer.

Sulmuesi u shpall fajtor dhe u dënua me vdekje, por më vonë u ridënua me burgim të përjetshëm pjesërisht për shkak të kundërshtimit të familjes King ndaj dënimit me vdekje.

Familja King pagoi për lindjen e Julia Roberts

Në një intervistë me Gayle King që u bë virale së fundmi, aktorja Julia Roberts konfirmoi një fakt pak të njohur për ditën e lindjes.

“Familja King pagoi faturat e mia në spital,” tha ajo, duke shtuar se familjet Roberts dhe King u bënë të afërta sepse prindërit e saj mirëpritën fëmijët e King në shkollën e tyre të aktrimit në Atlanta.

Më vonë, kur Julia lindi dhe familja e saj nuk mund të përballonte faturat e spitalit, King dhe gruaja e tij, Coretta, “na ndihmuan të dilnim nga situata”.

Ai ishte vetëm 39 vjeç kur u vra

Martin Luther King ishte vetëm 39 vjeç kur u vra më 4 prill 1968. Ai kaloi më pak se 13 vjet në sytë e publikut duke bërë fushatë për të drejtat civile dhe barazinë racore.

Por sipas King Center, në atë kohë të shkurtër ai ishte në gjendje të sillte më shumë përparim drejt barazisë racore në Shtetet e Bashkuara sesa 350 vitet e mëparshme.