Chiara Ferragni i dha mesazhet që donte të jepte përmes veshjeve, ndërkohë që në skenën e famshme të Ariston prezantonte Sanremon, në natën e parë.

U ndërrua katër herë dhe ky nuk është lajm i ri. Në spektakle të këtyre përmasave, po edhe ata në miniaturë, prezantueset vishen e zhvishen në prapaskenë për të shfrytëzuar disa nga fustanet që s’i kanë ndarë dot: këtë apo atë.

Kurse tek Chiara ndryshon historia dhe do mbetet në histori. Fustanet e saj s’kanë as xixa e as shkëlqim. Thelbin e kanë mbi të gjitha tek mesazhi.

Të gjitha veshjet e saj, sa të guximshme e rebele, aq elegante e me finesë i shpjegoi me detaje në Instagramin e saj.

Fustani Manifest

Maria Grazia Chiuri, drejtoreshë kreative e Dior, shpesh ka lançuar mesazhe feministe përmes veshjeve të saj. E s’kishte si të ndodhte ndryshe edhe këtë herë!

Ideja lindi nga një bisedë nga dyshja artistike Fulvia Carnevale dhe Claire Fontaine dhe rezultati ishte ky krijim i mrekullueshëm bardh e zi.

“Mendo e lirë” dëshiron të shtyjë të gjitha gratë të ndihen të lira të dalin nga roli që u imponon shoqëria. Me pak fjalë, një simbol i vërtetë i luftës kundër patriarkalizmit, një dedikim për gratë që thjesht duan të ndihen vetvetja pa u gjykuar.

Fustani Kafazi

Mesazhi: Çlirimi i gjeneratave të reja nga stereotipet gjinore, nga të cilat shpesh vajzat dhe gratë ndihen të mbyllura në kafaz.

Ky fustan u krijua nga Dior. Sipër jumpsuit-it është tyli me diamantë të rremë. Veshja përfaqëson shpresën për të thyer konventat e imponuara nga patriarkati. Një shpresë për vajzat e sotme që do të jenë gratë e së nesërmes. Kjo është dëshira e një nëne për vajzën e saj të vogël. Më në fund të bërtisni Fitore! Dhe Chiara ka pozuar matchy-matchy me Victoria-n e saj (emri i së cilës do të thotë fitore), si për ta dhënë të plotë mesazhin.

Veshja kundër urrejtjes

Me këtë fustan nga salla e Ariston, Chiara Ferragni iu përgjigj të gjithë atyre që vazhdimisht e kritikojnë për pamjen, trupin dhe mbi të gjitha lirinë e saj për t’u ndjerë grua, përveçse nënë. Frazat e përbuzjes të qëndisura me perlat e zeza janë fyerjet e vërteta që merr çdo ditë.

Fustani i paturpshëm

Rikthimi i vëmendjes te të drejtat e grave, dhe trupat e tyre për fat të keq, ende vihen në diskutim.

Ky është qëllimi pas kësaj pamjeje.

Fustani prej tyli është punuar nga Dior dhe ngjyra prej mishi riprodhon me një qëndisje trupin e Chiara Ferragni-t, natyrale dhe e çliruar nga ai turp të cilën bota ua ka imponuar gjithmonë të gjithave, duke filluar nga Eva, gruaja e parë në histori e shtyrë të ndjejë turp.

Ky iluzion i lakuriqësisë ka për qëllim t’u kujtojë të gjithëve të drejtën dhe barazinë gjinore pa pasur nevojë të ndihen të gjykuar apo fajtor.

Ky iluzion i lakuriqësisë ka për qëllim t’i kujtojë kujtdo se nëse vendos të tregohesh, apo të ndihesh seksi nuk i jep të drejtë askujt për të justifikuar dhunën e burrave ndaj grave apo për ta zbutur atë.

Trupi i një gruaje nuk është nxitës për mëkat.

Ky është trupi i të gjithëve. Kush s’ka bërë mëkate ta hedhë gurin i pari!