Përdorimi i telefonave inteligjentë dhe ndikimi në trurin e adoleshentëve

Pas mësimit rreth efektit të telefonave inteligjentë në trurin e gjeneratës së ardhshme, mund të mendoni dy herë për t’i blerë fëmijës tuaj një celular. Shkencëtarët kanë paralajmëruar se adoleshentët janë shumë më të prirë për t’u bërë të varur nga telefonat, pasi truri i tyre është ende në zhvillim, dhe përdorimi i tepruar mund të ketë pasoja të rënda.

Në këtë fazë të jetës, korteksi i paraballor, i njohur si “sistemi i kontrollit” i trurit, është ende duke evoluar dhe bëhet i varur nga kënaqësia e menjëhershme që sjell përmbajtja në mediat sociale. Gjatë një episodi të programit britanik “ITV”, ekspertët analizuan imazhet e rezonancës magnetike, të cilat tregonin si reagon truri i adoleshentëve ndaj përvojave të këndshme në platforma si “TikTok” dhe “Instagram”.

Profesoresha e neuroshkencës dhe shëndetit mendor, Ciara McCabe, shpjegoi se të rriturit, me trurin e zhvilluar plotësisht, dinë kur “mjaft është mjaft”, ndërsa adoleshentët nuk e kuptojnë këtë ndjenjë. Kështu, ata janë më të prirë ndaj sjelljeve të varësisë, pasi mësohen të kërkojnë atë stimulim të rregullt nga përmbajtja online, në vend që të përjetojnë gëzimet e jetës reale.

McCabe theksoi se përdorimi i smartphone-ve aktivizon pjesët e trurit që lidhen me shpërblimin, dhe ndryshe nga të rriturit, adoleshentët kanë korteksin paraballor që nuk është ende i zhvilluar plotësisht, duke i vënë ata në rrezik më të madh për varësi.

Studime të tjera, përfshirë një kërkim të vitit 2022 në SHBA, kanë treguar se adoleshentët që ndikohen vazhdimisht nga përmbajtja e telefonit zhvillojnë trurin ndryshe. Ekspertët nga Universiteti i Karolinës së Veriut zbuluan se të rinjtë që kontrollonin platformat online deri në 20 herë në ditë ishin “mbindjeshëm” ndaj reagimeve sociale nga bashkëmoshatarët, duke ndikuar në mënyrën se si truri i tyre reagonte ndaj botës përreth.

Bashkautori i studimit, Mitch Prinstein, zyrtar kryesor shkencor për Shoqatën Amerikane të Psikologjisë, theksoi se përdorimi i teknologjisë dhe mediave sociale ndodh në një periudhë të rëndësishme për zhvillimin e trurit. Hulumtimi tregon se ky zakon mund të ketë pasoja afatgjata dhe të rëndësishme për zhvillimin neurologjik të adoleshentëve, duke qenë thelbësor që prindërit dhe politikëbërësit ta kenë parasysh kur vlerësojnë përfitimet dhe rreziqet e përdorimit të teknologjisë nga të rinjtë.