“Mund të jemi forcë e parë opozitare”. Kështu u shpreh Dashamir Shehi, kreu i LZHK-së, i ftuar në studion e “Ditarit” me Bruna Çifligun, në A2 CNN.

“Ky është një hap i parë dhe kam shpresë që këtë radhë do të jetë një ditë e mbarë për ata njerëz që mendojnë ndryshe. Afrojmë njerëz më të mirë, më të rinj, që kanë kurajo t’i kthehen kryetarit… Kodi Zgjedhor që kemi është që të largojë të rinjtë nga politika.

Unë e konsideroj aktin më reaksionar marrëveshjen Rama-Berisha të vitit 2008. Nga aty kanë buruar shumë të këqija, që populli nuk kontrollon dot më pushtetin. Prandaj jemi kthyer në parti-shtet”, tha Shehi.

“Gjithashtu, besojmë se SPAK-u luan rol pozitiv”, tha Shehi, por shtoi se vota nuk është e sigurt, pasi nuk u lejua vota elektronike.

“Kjo ka ardhur si pasojë e një marrëveshjeje PS-PD për të hequr nga fusha “lojtarët” e tjerë. Ushtria e komisionerëve është politike, që ndikon në zgjedhje. Ata abuzojnë me votat e të tjerëve dhe me këtë ligj absurd, partitë e vogla nuk kanë komisionerë. Në një vend si Shqipëria, mendoni se disa njerëz do të ruajnë votat e rivalëve?

Që në fillim nis me paragjykim. Kjo është bërë për të vjedhur votat e atyre që nuk kanë komisionerë. Ne kishim shpresë të hiqeshin komisionerët me votën elektronike, por u kthyen mbrapsht”, shtoi Shehi.