Kur do i mbyllë Rama, bigbrother, përputhen apo ishulli tundimeve?!

Koment nga ARDIT HAXHIJA

Kur do i mbyllë Rama, bigbrother, përputhen apo ishulli tundimeve?!

Edi Rama po përpiqet ta shesë mbylljen e TikTok-ut si një akt “moral” për të mbrojtur shoqërinë shqiptare nga degjenerimi. Sipas tij, ky rrjet social po ndikon negativisht te rinia dhe po dëmton vlerat e shoqërisë. Por a është ky vërtet shqetësimi i tij?

Nëse qeveria do të ishte kaq e shqetësuar për ndikimin e mediave në shoqëri, atëherë do të kishte marrë masa për të ndaluar ose të paktën për të kufizuar programet si Big Brother, Për’puthen, Ishulli i Tundimeve dhe shumë të tjera që dominojnë kanalet kombëtare në prime time. Këto emisione, që transmetohen pa asnjë lloj kufizimi, përmbajnë dhunë, imoralitet dhe promovojnë pandershmërinë si një mënyrë jetese. Fëmijët dhe familjet shqiptare i ndjekin këto spektakle çdo ditë, pa asnjë mekanizëm mbrojtjeje.

Por këto programe nuk preken, sepse janë nën kontrollin e plotë të qeverisë. Mediat tradicionale në Shqipëri janë ose të kapura nga pushteti, ose të frikësuara nga goditjet financiare e ligjore. Ato nuk përbëjnë rrezik për qeverinë, përkundrazi, janë mjete të propagandës dhe argëtimit që e shpërqendrojnë publikun nga problemet reale të vendit.
TikTok-u, ndryshe nga këto media të kontrolluara, është një platformë e lirë, ku qytetarët mund të flasin hapur dhe të shpërndajnë informacione që qeveria nuk i kontrollon dot. Pikërisht ky është problemi i vërtetë i Ramës. Në prag të zgjedhjeve, ai nuk mund të lejojë një hapësirë të pakontrolluar komunikimi, ku qytetarët mund të organizohen, të informohen dhe të ndajnë pakënaqësitë e tyre pa filtrat e mediave të kapura.

Ndaj, në një vend ku programet më denigruese për shoqërinë promovohen nga televizione kombëtare pa asnjë kufizim, është qesharake të besohet se qeveria po e mbyll TikTok-un për të mbrojtur moralin dhe edukimin e brezave të rinj. Kjo është një lëvizje e pastër politike, një përpjekje për të mbyllur gojët e njerëzve përpara zgjedhjeve.

Nëse qeveria do të kishte vërtet një shqetësim moral, do të fillonte nga televizioni, jo nga TikTok-u.