Reformim të sistemit të drejtësisë paralajmëroi sot kreu i PD-së Berisha, diçka të cilën e ka përsëritur jo pak herë muajt e fundit.

Ai theksoi se Shqipëria nuk mund të jetë vend i besueshëm për qytetarët dhe investitorët pa drejtësi të pavarur duke nëvizuar se drejtësia e sotme është e njëjtë me atë në kohën e diktaturës.

“Shqipëria nuk mund të jetë kurrë vendi i shtetit ligjor, nuk mund të jetë kurrë vend i besueshëm për qytetarët e saj dhe investitorët pa një drejtësi që funksionon mbi parimet ndërkombëtare të sistemit të drejtësisë. Pa një drejtësi të pavarur, pa një drejtësi të varur në ligj, të varur në Kushtetutë. Drejtësia politike shqiptare përbën rrezikun më madhor për të sotmen dhe të ardhmen e kombit. Askush të mos mendojë se kjo drejtësi dallon nga një drejtësi e diktaturës. Miqtë e mi, ata që kanë jetuar vite e dekada në diktaturë, e dinë mirë se para skuadrave të pushkatimit kalonin edhe kriminelët. Nuk mund të themi se diktatura e shkuar kishte tolerancë ndaj krimit. E them këtë sepse duke u nisur nga disa ndëshkimet që u bëhen zyrtarëve të korruptuar, duan të përligjin përdorimin e saj si shpatë politike kundër kundërshtarëve. Po kjo është diktaturë.” – tha Berisha.

Kryedemokrati shtoi më tej se reforma në drejtësi është bërë nga Xhorxh Soros dhe ajo i ka lënë shqiptarët pa procese ligjore të ndershme.

Berisha paralajmëroi se nuk do e tolerojë drejtinë e bërë sipas reformës Soros dhe se me ndihmën e Komisionit të Venecias do e reformojë atë.

“U them këtyre zotërinjve, se kjo reformë e Xhorxh Sorosit i la shqiptarët, iu privoi qytetarëve shqiptarë të drejtën e një procesi ligjor të ndershëm. Nuk ka proces ligjor të ndershëm nëse pret 15 vite për të marrë vendimin. Dhe kjo ndodh në mes të Europës, kjo ndodh para projektorëve të saj. Dhe u dashka ne të pranojmë të lëmë qytetarët tanë pa sistem drejtësie për një akt korrupsioni ndërkombëtar të paparë? Kurrë. Ne nuk humbasim besimin tonë tek Komisioni i Venecias. Jo. Tek institucionet evropiane dhe amerikane. Por reformën e drejtësisë e bënë ata që shkruajtën Kushtetutën e vitit 1974. Janë sorosianët më të thekur të rajonit dhe Tiranës. Janë ekspertë mashtrues, falsifikatorë të huaj. Me dokumente!

Dhe tani kjo mbrohet si e shenjtë. Mos na shani reformën. Kujt ia thonë? Po pse, mund të sakrifikohet e drejta e një populli për të drejtën e një procesi ligjor të ndershëm? Po a e dini ju se çfarë po ndodh? Në qoftë se para 3 vitesh kishte 130 mijë dosje stok, tani stoku është 150 mijë. Ju mor të bërtisni, u them këtyre që bërtasin nga mëngjesi gjer në darkë se po sulmohet sistemi, jo mor, po mbrohen qytetarët.

Se ky është një krim i shëmtuar, të lësh një popull pa proces gjyqësor të drejtë, i ke bërë gjëmën atij populli. Ndaj dhe reforma do bëhet. Ne do reformojmë. Ndaj dhe siguroj se një reformë e sistemit të drejtësisë me Komisionin e Venecias dhe miqtë e aleatët më të mirë të Shqipërisë, institutet respektove që merren me të drejtën, do bëhet.” – theksoi Berisha.