Ylli i Hollivudit, Mel Gibson, një mbështetës i zëshëm i presidentit amerikan Donald Trump, i ka kërkuar qeverisë amerikane të zbulojë “të vërtetën” për sulmet terroriste të 11 shtatorit.

Aktori me origjinë australiane ndau një klip nga intervista e gazetarit Tucker Carlson me ish-kongresmenin Curt Weldon, e cila u publikua të hënën. Tragjedia që ndodhi gati 25 vjet më parë “mund të jetë skandali më i madh në historinë amerikane”, shkroi Gibson në X të martën, shkruan Rt.

Më 11 shtator 2001, terroristët e Al-Kaedës rrëmbyen katër avionë pasagjerësh dhe përplasën dy prej tyre në rrokaqiejt binjakë të Qendrës Botërore të Tregtisë në Manhattan. Një aeroplan i tretë goditi ndërtesën e Pentagonit dhe i katërti u rrëzua në një fushë në Pensilvani. Rreth 3000 njerëz u vranë.

“Tre ndërtesa u shembën sikur të ishin programuar për ta bërë këtë. Jo dy – tre. Deri më sot, askush nuk ka shpjeguar se si ra ndërtesa 7, edhe pse asnjë aeroplan nuk e goditi atë,” shkroi Gibson. Ai vijoi të argumentonte se “kullat ishin projektuar për t’i bërë ballë goditjeve të avionëve”.

“Çfarë ndodhi në të vërtetë atë ditë? Dhe pse askush nuk lejohet të flasë për këtë? Mjaft me frikën. Është koha për të vërtetën. Rreth 11 shtatorit. Rreth historisë. Për të gjithë ne,” shtoi Gibson në postimin e tij.

Sipas Institutit Kombëtar të Standardeve dhe Teknologjisë, ndërtesa 7 u shemb për shkak të zjarreve të ndezura nga mbeturinat e një prej kullave të goditura nga një aeroplan.