Aktualitet
“Patate e nxehtë” në duart e diplomacisë deklarata e komisionerit Hahn
Pas reagimeve të ashpra të Athinës ndaj deklaratës së komisionerit Hahn për çështjen çame, media greke vlerëson se marrëdhëniet greko-shqiptare do të hyjnë në një periudhë stanjacioni, për një kohë të papërcaktuar. Në një shkrim analitik, e përditshmja Kathimerini, gjykon se Johanes Hahn, me deklaratën e tij, ka lënë një “patate të nxehtë” në duart e diplomacisë greke.
Përgjigjja e komisionerit përbën një dokument zyrtar të BE-së në duart e diplomacisë shqiptare dhe do të përdoret sa herë që Athina dhe Tirana do tët entojnë të zgjidhin një nga mosmarrëveshjet e shumta. Nisur nga fakti që Athina ka qëndrimin konstat se “çështja çame nuk ekziston”, “është e qartë se marrëdhëniet greko-shqiptare po hyjnë në një periudhë stanjacioni për një kohë të pacaktuar”, konkludon qysh në fillon Kathimerini.
Reagimet e ashpra të ministrisë së jashtme greke u shënuan pasi komisioneri për fqinjësinë dhe zgjerimin, Johanes Hahn, përfshiu edhe çështjen e çame si pikë të axhendës së diskutimeve midis Athinës dhe Tiranës. Kjo deklaratë e tij u bë në përgjigje të një pyetjeje të eurodeputetes greke, Maria Spiraki. Eurodeputetja e kishte drejtuar pyetjen më 7 korrik, plot një muaj pasi ministri i jashtëm grek kishte vizituar Tiranës. Një protestë e organizuar nga PDIU dhe e prirë nga kryetari i kësaj partie, Shpëtim Idrizi, kishte vështirësuar hyrjen e shefit të diplomacisë greke në selinë e ministrisë së jashtme shqiptare.
Eurodeputetja e paretisë më të madhe opozitare, Demokracia e Re, praktikisht, vinte në dyshim të drejtën e Shqipërisë që të merrte financime nga fondet e BE-së si vend kandidat për anëtarësim, vëren Kathimerini.
Sipas gazetës greke, përgjigjja e komisionerit u dha më 7 shator, por mbeti në heshtje deri në fund të muajit të kaluar. “Të mërkurën, më 28 shtator, gjithë gazetat shqiptare njoftonin në faqen e parë se Brukseli e njeh çështjen çame”.
Sipas Kathimerini, “një detaj krucial, që shumëkush nuk e njeh”, është se të njëjtën ditë kishte mbërritur në Tiranë sekretari i përgjithshëm i ministrisë së jashtme greke, “për konsultime me homologun e vet shqiptar, në kuadër të përpjekjeve dypalëshe për të zgjidhur mosmarrëveshjet ndërmjet të dy vendeve”.
Dhe Kathimerini shton: “Vëzhgues me eksperiencë theksojnë se pubikimi i deklaratës së komisionerit Hahn ndihmon Shqipërinë, për arsye konsumi të brendshëm. E zhvendos debatin politik dhe vëmendjen nga presionet turke ndaj Tiranës që lidhen me shpërbërjen e shkollave të Fetulla Gulenit në Shqipëri dhe e transferon këtë debat në axhendën nacionaliste që ka gjithmonë popullaritet në vendin fqinj”.
Kathimerini citon edhe burime diplomatike, sipas të cilave konsiderohet e gabuar edhe lëvizja e eurodeputetes greke që i bëri pyetjen komisionerit, me argumentin se ngre pikëpyetje për atë se çka synonte me veprimin e saj.
Sipas burimeve, eurodeputetja do të duhet të jetë më e kujdesshme ndaj një çështjeje kaq të ndjeshme të politikës së jashtme. “Eurodeputetja duhej që këtë pyetje kaq delikate t’ia drejtonte përfaqësueses së lartë të BE-së, Federica Mogherini, e cila përgjigjet vetëm pas konsultimeve me shtetin anëtar që implikohet”, përfundon Kathimerini.
Duhet të jeni i kyçur në mënyrë që të mund të lini një koment Kyçu