“Loro Boriçi” sa larg përfundimit është?

Një muaj më parë Bashkia e Shkodrës dhe Federata Shqiptare e Futbollit arritën marrëveshjen për menaxhimin e stadiumit “Loro Boriçi” duke ndezur dritën jeshile të vazhdimit të punimeve për rikonstruksionin e kompleksit.

Menjëherë pas atij vendimi, punimet kanë rinisur me ritëm të lartë dhe kjo duket qartë edhe në terren ku stadiumi i ri ka nisur të marrë formë. Edhe pse ka ende shumë punë për të bërë, nga fotot e ditëve të fundit duket qartë pamja që po merr struktura. Aktualisht po punohet në disa sektorë, por ajo që bie në sy është shtrimi i një pjese të fushës, pasi tapeti i ri kërkon kohë.

Bari i fushës kërkon kohë që të jetë në kushtet ideale për zhvillimin e ndeshjeve, prandaj në përfundim të punimeve edhe fusha do të jetë funksionale. Ndërsa struktura që do të mbulojë një pjesë të tribunës nuk ka përfunduar ende, edhe puna për vendosjen e stolave në shkallët e stadiumit pritet të nisë gjatë javëve të ardhshme.

“Loro Boriçi” pritet të jetë gati për ndeshjet eliminatore të Botërorit 2018. Shqipëria debuton në datën 5 shtator të këtij viti kundër Maqedonisë dhe sipas të gjitha gjasave, impianti i qytetit të Shkodrës do të hapë dyert për kuqezinjtë të cilët do të rikthehen pas shumë viteve në stadiumin e qytetit verior.