A ju duhet ndonjë mig?

Ministria e Mbrojtjes ka nxjerrë në shitje 40 helikopterë dhe avionë jo luftarakë duke u bërë thirrje të gjithë personave të interesuar të dërgojnë ofertat e tyre.

Në total vlera e helikopterëve jo ushtarakë do të nisë në ankand me 61. 4 milionë lekë të rinj ose afro 600 mijë dollarë, një shifër thuajse modeste po të mbahet parasysh vlera reale e tyre.

Çmimi më i ulët i ankandit fillon me 1.1 milionë lekë të rinj për një helikopter, ndërsa më i shtrenjti me 1.9 milionë lekë.   Ankandi do të mbahet në datën 22 shkurt dhe deri atëherë të interesuarit mund të paraqesin ofertat e tyre.

Konkretisht në shitje janë nxjerrë disa lloje helikopterësh dhe avionësh si: Jak-18 (6 copë), Mig-15 (3 copë), Uti-Mig (3 copë), Mig 17 (4 copë), Uti-Mig 17 (4 copë), Mig 19 (10 copë), Mig-21 (6 copë) dhe helikopterë Mi-4 (4 copë).

Ajo që bie në sy është fakti që shuma totale me të cilën do të nisë shitja e helikopterëve dhe avionëve është shumë e vogël në krahasim me vlerën e tyre si dhe numrin e tyre të madh, pasi bëhet fjalë për 40 copë avionë dhe helikopterë.

Pjesa më e madhe e helikopterëve dhe avionëve ndodhen në Gjadër dhe Kuçovë. Të interesuarit për të marrë pjesë në ankand duhet të paraqesin disa dokumente standarde si, formulari i njoftimit, formulari i ofertës, ftesa për ofertë, formulari i njoftimit të fituesit dhe formulari i publikimit të njoftimit të fituesit. Dokumentet e ankandit mund të tërhiqen pranë autoritetit shitës.