Të gjitha detajet për masakrën, viktimat, autorët dhe hetimet

Luftë e përgjakshme në mes të Elbasanit mes grupeve në larje hesapesh dhe hakmarrje të vjetra, të nisura që prej ekzekutimit të Sokol Çapjas në dhjetor 2005 dhe që për motiv kanë pasur trafikun e drogës.

Tre persona mbetën të vrarë në vend dhe 7 të tjerë u plagosën rëndë nga breshëria e një automatiku që u derdh prej një makine “Benz” me 3 atentatorë, që hyri befasisht në ambientet e kompleksit “Univers”, afër stadiumit “Elbasan Arena”.

Objektiv ka qenë fisi Çapja për shkak të serialit hakmarrës me fisin Mema në këtë qytet prej dhjetë vitesh.

Një prej viktimave është pronari i biznesit, Agron Çapja, shënjestra e autorëve e njëkohësisht vëllai i Sokolit, si dhe Ardit Sinakolli e Eno Bedalli. Mes viktimave mendohet se ka edhe punonjës të lokalit dhe detajet pritet të sqarohen në hetimet e mëtejshme.

Kurse të plagosur rëndë mbetën edhe miqtë dhe të afërmit e tjerë që ishin ulur në dy tavolina, Ardian Zharri, Fjzulla Çapja, Ferit Muça, Luan Muça, Bujar Reshka, Florenc Çapja dhe Arnold Çapja, këta të fundit nipi dhe djali i viktimës.

Kurse autorët e krimit janë identifikuar dhe shpallur në kërkim, pasi ishin të pamaskuar dhe dyshohet se mbanin rroba policie ose kamuflazh.

Atentati

Ka qenë ora 20:30 kur janë dëgjuar breshëri automatiku në lagjen “Krastë”, afër aksit rrugor Elbasan-Librazhd, nga pjesa e pasje e stadiumit të qytetit.

Në pak sekonda u mësua se bëhej fjalë për një atentat me shumë viktima, pas thirrjeve për ndihmë të të mbijetuarve dhe dëshmitarëve. Fillimisht u raportua për 7 të plagosur dhe më tej dolën shifrat për 3 të vrarë. Deri rreth orës 21:00 informacionet ishin konfuze, derisa policia sqaroi se bëhej fjalë për një sulm me motiv hakmarrjen për konfliktet e vjetra.

Rreth orës 22:00 u bë me dije se kishte 3 të vrarë dhe 5 të plagosur dhe një orë më pas u konfirmua se kishte edhe 2 të plagosur më tepër dhe u publikuan emrat e tyre. Policia tha se shënjestër e autorëve ka qenë kompleksi “Univers”, në pronësi të fisit Çapja.

Pikërisht dy tavolinat ku ishin ulur ata para lokalit. Të mbijetuarit i thanë policisë se autorët mbanin veshje policie, por kjo nuk u konfirmua. Kamerat e sigurisë së bizneseve dhe stadiumit kapën mjetin “Benz” me ngjyrë gri të autorëve dhe pamje të tyre. Policia tha se ka të paktën 3 emra autorësh, por nuk i identifikoi për arsye hetimore.

Viktimat

Pati shumë konfuzione me viktimat dhe të plagosurit, për shkak të ngjarjes së rëndë dhe numrit të lartë të të dëmtuarve. Por për policinë, shënjestër ka qenë pikërisht fisi Çapja dhe kjo për shkak të hakmarrjes së nisur prej vitit 2005, kur tek lokal “Akuarium” u vra Sokol Çapja.

Si fajtor familja akuzoi ish-oficerin e Policisë Rrugore, Fadil Mema, i cili pas dy atentateve të dështuara në 2009 dhe 2012, u vra marsin e kaluar në Torino të Italisë.

Pikërisht hakmarrja për këtë ngjarje dyshohet se është motivi i masakrës së mbrëmshme.

Policia dha edhe emrat e viktimave, Agron Çapjes, vëllai i Sokolit, Ardit Sinakollit, që mendohet se është punonjës i kompleksit dhe Eno Bedalli. Kurse të plagosurit në spital janë Ardian Zharri, Fjzulla Çapja, Ferit Muça, Luan Muça, Bujar Reshka, Florenc Çapja dhe Arnold Çapja, ky i fundit djali i Agronit dhe nipi i Sokolit. Kurse Florenc Çapja ka qenë i hetuar më parë për plagosjen e Memës në Elbasan, por nuk u gjetën prova.

Kaosi

Ngjarja që cilësohet e përmasave më të rënda e ndodhur në Elbasan, shkaktoi edhe një lloj kaosi. Kjo pasi u raportuan shifra të ndryshme të vrarësh dhe të plagosurish. Derisa Ministria e Shëndetësisë dërgoi në disa rrugë për transport helikopterin e saj për të lëvizur të plagosurit.

Dhe Policia e Shtetit mbrëmë në mesnatë tha se 7 të plagosurit janë transportuar në Spitalin e Traumës, ku 2 prej tyre ndodhen në gjendje të rëndë, pasi kanë shumë plumba.

Në vendngjarje u gjetën tavolina dhe karrige përmbys, pellgje gjaku gjithandej, xhama të thyer nga plumbat dhe mure të plasaritur.

Kaos ka pasur edhe në spitalin e Elbasanit për shkak të prezencës së familjarëve të shumtë. Ndërsa pritet të sqarohen lidhjet mes viktimave, nëse ka edhe të pafajshëm.

Terrori

I gjithë qyteti përjetoi një terror të vërtetë nga ngjarja e ndodhur, aq sa u boshatisën të gjithë lokalet dhe dyqanet në pak minuta.

Kjo edhe për shkak të prezencës së madhe të policisë që vuri në “shtetrrethim” qytetin dhe veçanërisht aksin Elbasan-Librazhd dhe lagjen “Krastë” ku ndodhi atentati. Autorët kanë lëvizur pikërisht drejt daljes së qytetit për t’u arratisur dhe dyshohet se janë fshehur në banesa të braktisura.

Rrugët e qytetit u zbrazën të gjitha dhe mbrëmë vonë shikoje vetëm makina dhe forca policie.