Cilët janë disa prej gazetarëve të dhunuar këto 10 vitet e fundit?

Eni Shehu është gazetari i fundit i goditur nga drejtori i Teatrit Kombëtar Hervin Çuli. Në 10 vitet e fundit janë raportuar disa lajme të tilla ku ndaj gazetarëve është ushtruar dhunë për shkaqe që lidhen me detyrën e tyre.

Luan Rama kundër Ilir Babaramos
Në vitin 2003 Ministri i Rendit Publik, Luan Rama, ka goditur me grushta gazetarin Ilir Babaramo, ndërsa socialistët ishin mbledhur për të festuar fitoren në zgjedhjet vendore. Kjo ngjarje shkaktoi menjëherë reagimin e mediave televizive të cilët kërkuan shkarkimin e Luan Ramës. Dy ditë më vonë Kryesia e Partisë Socialiste miratoi propozimin e Kryeministrit Fatos Nano për shkarkimin e Ministrit të Rendit Luan Rama dhe zëvendësimin e tij.

Rezart Taçi kundër Mero Bazes
Në vitin 2009 është sulmuar fizikisht gazetari Mero Baze nga Rezart Taçi, pronari i kompanise “Taçi Oil” dhe truprojat e tij. Pas ngjarjes, Mero Baze, me trauma serioze ne kokë dhe në trup u dërgua në Spitalin Ushtarak të Tiranës ku mori edhe ndihmën e parë. Më pas gazetari bëri kallëzimin në polici ku dëshmuan edhe kolegët që ishin prezent në ngjarjen e rëndë. Në një intervistë për “Zërin e Amerikës”, Mero Baze tha se incidenti ka ardhur për shkak të detyrës së tij si gazetar pasi kishte bërë një sërë shkrimesh kritike që lidheshin me veprimtarinë ekonomike të kompanive të drejtuara nga Rezart Taçi të cilat i ka akuzuar për evazion fiskal.

Edi Rama kundër Adi Krastës
Gazetari dhe moderatori i “A Krasta Show” në “Agon Chanel”, Ardian Krasta u raportua të ishte goditur, sharë dhe kërcënuar nga kryeministri Rama në një mbrëmje ku ishin të ftuar të dy në vitin 2014. Sipas ekspres.al Rama ka nisur të përdorë një fjalor banal ndaj Krastës pas kritikave që ai i kishte bërë publikisht. Sipas raportimeve të disa gazetave dhe portaleve online, Rama e ka gjuajtur atë me lugë dhe Krasta i është përgjigjur në të njëjtën mënyrë. Ndërkohë që Rama sulmonte me tezën e “një sulmi të padrejtë dhe mosmirënjohës ndaj një miku” Krasta mbrohej me tezën e “fjalës së lirë”. Për këtë ngjarje nuk u fol menjëherë. Pas një muaji reagoi televizioni ku ai punonte duke e quajtur sulmin ndaj Krastës si një sulm ndaj tyre.

Truprojat e Ilir Beqaj kundër Elio Lazes
Në shkurt të vitit 2015, gazetariElio Laze (televizioni “Channel One”) është goditur nga truprojat e ministrit të Shëndetësisë, Ilir Beqaj pas një rasti denoncuar për rrezikshmërisë e hedhjes së mbetjeve spitalore. Sipas këtij televizioni, Ministri Beqaj kishte qenë i pranishëm në momentin e sulmit ndaj gazetarit.

Agustin Kola kundër Adriatik Ballës
Në vitin 2009 Agustin Kola, tekniku i skuadrës së Tiranës, në një shpërthim nervash fyeu, kërcënoi dhe më pas qëlloi gazetarin e “Panorama Sport”, Adriatik Ballën. Ky i fundit ishte duke intervistuar futbollistin e Tiranës, Andi Lilën kur Agustin Kola ka urdhëruar me një ton të ashpër mbrojtësin që të mos jepte asnjë deklaratë për Ballën. Kola ka kërkuar hapur që gazetari Balla të nxirrej jashtë kompleksit, por pa dhënë asnjë shpjegim. Kur gazetari nuk ka pranuar të largohej, Kola e ka qëlluar gazetarin Balla me grusht. Pas kësaj ngjarje nuk ka pasur deklarata dhe as falje publike nga ana e Klubit të Tiranës.

Policia private kundër Arjan Xhani dhe Telnis Skuqit
Në vitin 2013 gazetari dhe fotoreporteri i ATSH-së Telnis Skuqi denoncoi publikisht ushtrimin e dhunës ndaj tij dhe kolegut të tij të Top Channel, Arjan Xhani në Përmet. Pasi kishin shkruar për të raportuar për një çështje pronësie, ata deklaruan se janë dhunuar në mënyrë verbale dhe më pas fizike nga kompania private e sigurimit “Aulona”, e cila ishte pajtuar nga një zyrë përmbarimi. Ato pak pamje që gazetari mundi të shpëtonte pasi deklaronte se u kishin marrë dhe kamerën, i hodhi në Youtube.

Truprojave e pronarit të fabrikës së çimentos në Fushë – Krujë kundër Dashamir Biçakut
Në vitin 2012 gazetari i “Shekullit”, Dashamir Biçaku u dhunua fizikisht nga truprojat e pronarit të fabrikës së çimentos në Fushë – Krujë, të cilët e goditën me grushta ndërsa fotografonte Charles Boiun duke dalë nga Drejtoria e Policisë. Unioni i gazetarëve ka protestuar përpara drejtorisë së policisë së Tiranës lidhur me dhunën ndaj gazetarit të “Shekullit”. Gazetarë të mediave vizive dhe të shkruar në vend kanë kërkuar marrjen e masave urgjente për dënimin e truprojave.