“Dy rënie në një ditë”

Të biesh nga kategoria është një fatkeqësi në aspektin sportiv për çdo klub e natyrisht dhe për çdo futbollist, por ka edhe më keq, si për shembull të biesh nga kategoria me dy klube brenda një dite.

Një gjë e tillë i ka ndodhur mbrojtësit të ri Ljuis Kinsela, i cili është i federuar me Aston Vilën, ku do të kthehet në fund të sezonit, por për momentin është i huazuar te Kiderminster, në Konferencën angleze (divizioni i pestë).

Të shtunën Aston Vila ra zyrtarisht nga Premier Liga, por edhe Kiderminster me Kinselën në fushë ra nga Konferenca.

“Dy rënie nga kategoria në një ditë”, shkruante në Twitter pas ndeshjes Kinsela, i cili gjithsesi e ka marrë me humor.