Ndahet nga jeta aktori Bud Spencer

Është ndarë nga jeta në moshën 86 vjeçare aktori i njohur italian, Carlo Pedersoli, i njohur si Bud Spencer. Ai lindi në Napoli në vitin 1929 dhe ishte fillimisht një notar profesionist. Si i tillë Pedersoli ka hyrë në historinë e sportit italian, si italiani i parë që përshkroi 100 m stil i lirë në më pak se një minutë. Pedersoli hyri në kinema me një rol të një anëtari të Gardës Pretoriane në filmin “Quo Vadis” të vitit 1951, por deklaroi se nuk kishte interes për këtë karrierë. Një kompani prodhimesh i kërkoi të ndryshonte emrin për ta bërë më të marketueshëm dhe me këtë rast Pedersoli zgjodhi Bud për dashurinë që kishte për Budwieser dhe Spencer për simpatinë ndaj Spencer Tracey. Bahskëpunimi i tij me një tjetër italian, njohur me emrin artistik, Terence Hill, i dha famën në vitet ’60. Spencer i ka ardhur edhe publikut shqiptar me disa filma që kombinojnë aksionin me humorin, si “Këmbëmadhi”, “Më mirë një mik sesa një thesar”, “Llamba e Aladinit”(Aladdin) etj., gjithnjë në rolet ku as ai, as Hill nuk janë personazhe negativë.  Një aktor i dashur për një brez adoleshentësh shqiptarë, por edhe me një pozitivitet në role që ngjan si karizmë origjinale e Pedersolit, më shumë sesa aktrim.