Deputeti i PS sulmon Tahirin

‘Shpërthen’ deputeti socialist Artan Gaçi.

Nga foltorja e Kuvendit, Gaçi, duke cituar disa nga ngjarjet më të bujshme të javës, i ka dhënë një ‘shuplakë’ edhe ministrit Saimir Tahiri sa i takon largimin të investitorit libanez, Fadi Mitri.

Ligjvënësi i majtë e ka cilësuar një akt të rëndë largimin e investitorit nga Shqipëria, në një kohë që Policia e Shtetit merret me shpëtimin e një koteleje, duke ironizuar kështu Tahirin.

“Dy parti që zihen për gjuhën shqipe në Maqedoni, një ambasadore flet si t’i dojë qejfi për territorin detar. Një kotele që shpëtohet nga policia. Ikën një biznesmen me barelë dhe vjen një amendim për ligjin e plehrave. Investitori libanez, që la Shqipërinë me barelë, ishte një ngjarje e dhimbshme. Terrorizëm ndaj të ardhmes, jo vetëm prej turizmit. Biznesmenë që guxojnë, prodhojnë dhe pothuajse dështojnë. Duhet reaguar me më shumë forcë”, tha Gaçi.

Edhe kryeministri Edi Rama ka folur në Kuvend për biznesmenin libanez Faadi Mitri, i cili u masakrua dhe u detyrua të largohej me barrela nga Shqipëria.

Rama duke iu përgjigjur akuzave të Berishës dhe opozitës, tha se fajtor për këtë që ndodhi është gjykatësja e korruptuar dhe sistemi i drejtësisë që la qeveria e Berishës.

“Sali, koha jote ka vdekur, lëre kohën tënde, se sa herë merr fjalën do të na çosh për vizitë në varrezën e kujtimeve të tua. Ato thuaja vetës para pasqyrës, pasi sot para pasqyrës sipërmarrësi që u largua mund të shikojë plagët e sistemit që ngrite ti. Ai sipërmarrës që u largua ka ardhur në zyrën time pasi ne kemi marrë detyrën dhe më ka parashtruar nga a në zh të gjithë kalvarin e zvarritjeve dhe të tmerreve të viteve të tëra kur nuk merrte dot zgjidhje për problem që ishin thjesht e vetëm të natyrës administrative”, tha Rama, duke shtuar se faji është i drejtësisë.

“Këtë drejtësi ne duam ta përmbysim me reformën në drejtësi dhe me vetingun, në mënyrë që gjykatëse si ajo që ka dhënë vendimin në fjalë, të japin llogari”, tha Rama.

Kurse Berisha akuzoi nga foltorja e Kuvendit qeverinë për dëbimin e biznesmenëve nga vendi, duke iu referuar rastit të kompanisë libaneze “Omnix”.

“Qeverisë i është ankuar konsulli shqiptar në Liban sepse biznesmenin libanez e ka kërcënuar Besnik Sula me jetë”, tha Berisha.

Sipas tij, “ndaj kompanisë “Omnix” ka qenë kryeministri Edi Rama që i anuloi dokumentin.

“Pastaj e rikthyet sepse i morët ryshfet, por i donit ryshfet më të madh, prandaj ai iku”, ka thënë Berisha.