Jorida Tabaku: 8 dhjetori është shpresa e të rinjve!

Partia Demokratike nisi pikërisht sot, nën atë frymëzim dhe dëshirë më se legjitime, nga të rinjtë të cilët risollën edhe një herë pishtarin e një lirie që ndriçoi errësirën në të cilën komunizmi dhe tirani me shërbëtorët e tij e kishin zhytur vendin.

Të rinjtë, ishin dhe janë një nga shtysat më të rëndësishme të një Partie që lindi me idealet e Dhjetorit. Ideale të cilat asnjëherë nuk mund të shuhen dhe që përherë do të jenë qendra e rëndesës dhe frymëzimi për këdo që vjen më pas, e kush mendon ndryshe gabon.

Në fakt, gabon rëndë! Të rinjtë sot kanë mundësinë dhe shpresën për të ndryshuar rrjedhën e ngjarjeve. Për të besuar në Partinë Demokratike, e cila ndryshe nga Partia Socialiste, nuk doli nga rrënojat e një të majte ekstreme, por nga ëndrrat dhe idealet e të rinjve që donin të rrëzonin të djeshmen e errët.

Vetëm së bashku, mundet të ndryshojmë gjendjen e mjeruar dhe pashpresën që Rilindja ka rikthyer në vend. Vetëm së bashku mund të vazhdojmë një rrugë të nisur herët për të ndërtuar atdheun tonë një shtëpi të madhe dhe të paqshme e të begatë.

Ku arsimi të mos jetë një dëshirë e qeverisë por një meritë dhe preferencë e të rinjve. Ku puna të mos jetë në hambarët e drogës apo kullotat me hashash, por një punë dinjitoze. Ku biznesi të mos jetë përkthyer në shanse për militantë partie që komentojnë pa fund në statuset e kryeministrit, por mundësi reale për çdo të ri.
Ku e ardhmja mos të jetë metafora për të kuptuar largimin prej kësaj toke!

Kjo ditë, ngjall shpresën se ndryshimi është i mundshëm dhe vetëm së bashku ne mund t’ia arrijmë të largojmë ato që na vrasin shpresën dhe i shtujnë të rinjtë të largohen nga vendi jonë.