Këto janë makinat më të kërkuara në Evropë

Një listë me pesë modelet e makinave më të kërkuara në Evropë.

Lista e pesë makinave më të shitura në tregun evropian për vitin e kaluar nuk ka ndryshuar shumë në krahasim me një vit më herët, por ka ndryshuar vetëm renditja e tyre në listë.

Kur bëhet fjalë për modelin më të shitur të veturave në Evropë, që një kohë e gjatë nuk ka pasur befasi në kreun e listës. Sikur edhe viteve të kaluara, Volkswagen Golf edhe më tej bindshëm është vetura më e kërkuar e udhëtarëve në kontinentin e vjetër.

Edhe pse në vitin 2016 shënoi rënie të ndjeshme të shitjes (-7,8%), Golf me 492.952 njësi të porositura ka lënë dukshëm larg konkurrentët e tij.

Në vendin e dytë është ngjitur Renault Clio, me ngritje prej 3% dhe 315.115 vetura të shitura, derisa i treti është Volkswagen Polo, i cili në vitin 2015 ishte i katërti, me 308.561 njësi të porositura.  Duke iu falënderuar rënies së shitjes në vitin 2016 (-4,4%), Ford Fiesta ka rrëshqitur nga vendi i dytë në të katërtin me 300.528 njësi të shitura.

Listën e pesë modeleve më të kërkuara në Evropë për 2016 e përmbyll Opel/Vauxhall Corsa, e cila ka arritur deri te 264.844 blerës. Në mesin e pesë modeleve më të shitura janë katër modele nga i ashtuquajturi segment “B”-automobila të vegjël, të cilët përdoren për rrugë të shkurtra.

Shitje të madhe ka shënuar Astra (+29,6), me ngritje nga pozita 13 në të gjashtën. Në vitin 2016 janë porositur 253.483 automobila, duke iu falënderuar më së shumti gjeneratës së re që ka ardhur në treg.