Hora e Arbëreshëvet është një qytezë arbëreshe me mbi 6.500 banorë në krahinën e Palermos, të rajonit të Sicilisë në Itali.

Ajo njihet si kryeqytet i arbëreshëve, një nga bashkësitë më të mëdha të komuniteteve historike shqiptare të Italisë, qendra më e rëndësishme dhe më e populluar e arbëreshëve të Sicilisë.

Hora e Arbëreshëvet ndodhet 24 km larg nga Palermo.

Ajo ka ruajtur shumë elemente etnike të kulturës së saj shqiptare, veçantitë e saj kulturore, gjuhësore, fetare.

Banorët janë pasardhës të familjeve shqiptare, duke përfshirë edhe fisnikët dhe të afërmit e Skënderbeut, që u vendosën në Italinë e Jugut gjatë pushtimeve të Perandorisë Osmane në Ballkan.

Identiteti i Horës së Arbëreshëvet është i fortë, në fakt gjuha arbëreshe flitet nga tërë bashkësia dhe përdoret në gazeta, shkolla dhe radio.

Bashkia përdor në dokumentet zyrtare dygjuhësore gjuhën shqipe dhe italiane për banorët e saj, në bazë të ligjit ekzistues për mbrojtjen e pakicave etnike dhe gjuhësore në Itali.

Sot jetojnë këtu shumë shqiptarë të tjerë, që erdhën gjatë emigracionit të fundit shqiptar.

Hora e Arbëreshëvet u themelua më 30 gusht të vitit 1488 nga një grup shqiptarësh nga Himara. Në fundin e viteve 1400 një sulm i perandorisë turko-osmane i detyroi familjet e Arbërisë të linin vendin dhe të iknin për lirinë drejt anës tjetër të detit Adriatik për në Itali.

Edhe pse kanë kalur shekuj, ata vazhdojnë të ruajnë zakonet, traditat, gjuhën dhe çdo gjë tjetër ashtu si para 500 vitesh.

Kur mësuan se Shqipëria do të vinte të luante në Palermo ndaj Italisë për ta ishte një festë e jashtëzakonshme, madje kur i pyet se për kë do të bëjnë tifo të premten, të përgjigjen paksa me ironi:

“Përderisa kemi ruajtur traditat dhe gjuhën për 500 vjet, a mos ndoshta mendoni se do të mbështesim Italinë”

Arbëreshët e Siçilisë por dhe rreth 5 mijë shqiptarë të tjerë të ardhur pas viteve 90 do të jenë në mbështetje të kuqezinjve, pa llogaritur avionat pa fund me tifozë shqiptarë zbarkojnë në Palermo në dy ditët e fundit.

Ndaj Italisë luajmë në shtëpi apo jashtë fushe?