Bundesliga ka shënuar një rekord të ri të numrit të tifozëve në stadium për të dyja kategoritë në sezonin 2016/17.
19.049.362 spektatorë kanë ndjekur 612 ndeshje të Bundesligës 1 dhe Bundesligës 2. Krahasuar me sezonin 2015/16, rritja është 1,3%.

Në Bundesligë, veçanërisht, mesatarja e tifozëve në stadium është 40.693, ose ndryshe 91% vende të zëna në stadium për të 18 skuadrat e Bundesligës. Krahasuar me sezonin e kaluar, të dhënat janë në rritje.

Ndër të tjera duhet theksuar se në Bundesligën 1, për shkak të rënies nga kategoria të disa skuadrave me emër dhe gjithashtu ngjitjes së disa të tjerave, kapaciteti total i stadiumeve ishte reduktuar, por kjo ka sjellë më shumë tifozë në stadiumet e Bundesligës 2, ku për çdo ndeshje janë regjistruar mesatarisht 21.560 persona për ndeshje, me një rekord të ri në rritje prej 13% krahasuar me një vit më parë.

Duhet nënvizuar se, Shtutgart, pjesë e Bundesligës 2 sezonin që sapo u mbyll, ka regjistruar mesatarisht 50.515 persona për ndeshje. 10 skuadra të Bundesligës 2 kanë regjistruar mesatarisht 20 mijë tifozë në stadium për ndeshje, ku spikat Hannover 96 që ka arritur mesatarisht edhe 36 mijë persona.

Në vend të tretë është St.Pauli, skuadra e dytë e qytetit të Hamburgut e cila numëron mesatarisht 29.401 persona për ndeshje.
Ndërkohë, Union Berlin (mesatarisht 20.859 persona në stadium) po përpiqet të rrisë më tej kapacitetin.

Në Bundesligën 1, numri i tifozëve në stadium të Borussia Dortmund shkon mesatarisht 79.653, shifër rekord, ndjekur nga Bayern Munchen me 75 mijë spektatorë për ndeshje. Vetëm skuadra të vogla si Darmstadt (pak më shumë se 16 mijë tifozë) e Ingolstadt (pak më shumë se 14 mijë tifozë) nuk arrijnë të kapin shifrën 20 mijë tifozëve në stadium.

Këtë vit, këto dy skuadra kanë rënë në Bundesligën 2 duke ua lënë vendin Shtutgartit dhe Hannover 96. Kjo do të thotë që në sezonin e ardhshëm, është e natyrshme të presim një rritje të mëtejshme të tifozëve në stadium, me Bundesligën që do të bëhej kampionati i parë në të cilin në çdo ndeshje do të regjistroheshin më shumë se 20 mijë persona në stadium, duke e çuar mesatarisht më shumë se 41 mijë persona për ndeshje.
Kështu Bundesliga konfirmohet si kampionati më i ndjekur në botë në stadiume.