Mesnatën e kaluar ishte afati i fundit për dorëzimin e listave të kandidatëve për deputetë në zgjedhjet e 25 Prillit. Dhe të tre partitë kryesore PS, PD dhe LSI arritën t’i dorëzonin listat në kohë.

Lulzim Basha kryeson listën e partisë së tij në Tiranë, ndërkohë që Edi Rama dhe Monika Kryemadhi kanë vendosur të kandidojnë në më shumë se një qark.

Kreministri Edi Rama do të kandidojë në Vlorë dhe në Durrës në vendin e 8-të të listës së PS-së, duke u vendosur në kufi të bazës së mandateve që pritet të marrin. Ndërkohë zonja Kryemadhi kryeson listën në Tiranë, Elbasan dhe Fier.

E kështu siç vihet re, nuk do të kemi një përballje në të njëjtin qark mes Ramës, Bashës e Kryemadhit, çka do të kishte qenë interesante për t’u parë. Megjithatë kjo dihej që më parë, pasi liderët e partive e kishin lënë të kuptohej se ku do kandidonin.

Si socialistët ashtu dhe demokratët kanë bërë ndryshime të forta krahasuar me emrat e zgjedhjeve të kaluara.

Vihet re një diferencë mes PS-së dhe PD-së në rreshtimin e kandidatëve në lista, ku të dytët i janë përmbajtur përgjithësisht një rreshtimi që ka për bazë fuqinë elektorale të secilit kandidat, por socialistët kanë bërë të kundërtën. Ata kanë vënë në pjesën fundore të pjesës së sigurt të listës së tyre, emrat e drejtuesve politikë të qarqeve. Në krye të listës së Dibrës vendoset një emër i panjohur më parë, një emigrant me një histori suksesi në Londër, Lavdrim Krashi.

Përveç Krashit që drejton në Dibër dhe zv.kryeministrit Erion Braçe në Fier, listat e PS-së kryesohen nga gra.

Një pjesë e mirë e figurave të njohura politike të PS-së nuk janë përfshirë fare në lista, por bënë deklarata se kishin vendosur të tërhiqen nga kandidimi. Siç janë rasti i Vasilika Hysit, Eglantina Gjermenit, Besnik Bares, Musa Ulqinit.

Në krahun tjetër edhe zoti Basha ka ndërmarrë ndryshime të forta duke lënë jashtë gjithashtu emra të njohur, ndërsa të tjerë, sikundër dhe në rastin e socialistëve, janë zbritur në zonat jo të sigurta të listave. Janë të paktën 11 ish-deputetë demokratë të cilët janë lënë jashtë, mes tyre dhe emra si Genc Pollo.

Në polin tjetër, edhe PD është detyruar të bëjë disa largime për t’u bërë qejfin dhe aleatëve.

Vetëm në Tiranë, në pjesën e sigurt të listës janë 5 emra të aleatëve: Fatmir Mediu, kreu republikan, Shpëtim Idrizi i PDIU-së së bashku me Mesila Dodan, Vangjel Dulen e PBDNJ-së dhe Dashamir Shehin e LZHK-së.

Ndërsa demokristiani Nard Ndoka, është renditur në zonë thuajse të pasigurt.

Më poshtë keni tabelën e përballjeve të tre forcave kryesore politike në të 12 qarqet.