Me celular – Edison YPI

Celulari nuk është vetëm për llogje Kavaje dhe mesazhe Gjirokastre.

Me celular mund të blesh sende, të paguash fatura, të krruash bythën, të bësh selfie.Me celular hedh në erë një makinë ose një shtyllë.Me celular shet e blen votën.Me celular dhe pseudonim, shan, shpif, trillon, intrigon, për njerëz me emër e mbiemër.

Me celular, pa luajtur vendit, vetëm me një rrjesht e gjysëm në Fejsbuk, edhe nëse je cop muti, mundesh me e shpall veten patriot të zjarrtë që flijohesh për Shqipërinë.Me celular bën shkrime gazete me 1 mijë fjalë dhe 2 mijë gabime.

Nuk është e largët dita kur me celular do presësh thonjtë, do krruash dhëmbët, do pastrosh veshët.Modele më të avancuara celularësh pas pak do mund të përdoren si çekiç, si sqepar, si thikë me helm për vdekje të sigurtë.Po punohet gjithashtu për një celular që do zëvendësojë briskun për rruajtjen e mjekrrës dhe prerjen e fytit.

Ende nuk ka celular që të jetë njëkohësisht copë djathi, rrotë sallami, misër i pjekur, kofshë pule, filxhan kafeje, thekse buke. Por s’ka vend për dekurajim.

Edhe për këta lloj celularësh po punohet.Në varësi të faktit sa smart është celulari dhe sa budalla është përdoruesi, celulari do mund të bëhet fare mirë sharrë, kaçavidë, si dhe lugë për të trazuar sheqerin, për të ngrënë tavë kosi, për të mbathur këpucët, si dhe pirun e thikë për t’ja prerë tjetrit mishin në llokma.Shpikja e një celulari që do vlejë si letër higjenike për fshirje bythe është gjithashtu në prag.

Si të bëhesh me anë të celularit i njerzishëm, i ndjeshëm, i këndshëm, i dashur, i aftë për të derdhur lot, sidomos si të ngjizësh kalamaj me celular, tanipërtani nuk është e mundur. Por është pengesë provizore. Së afërmi celulari do bëhet vegla e parë jo prej mishi me anë të së cilës humanoidët do shumzohen.