Aktualitet
Bujar Nishani i zhgënjyer nga Basha: PD ka mbetur në 2015-n
Ish-presidenti Bujar Nishani tha në “Arnautistan” në MCN TV se është i zhgënjyer nga kreu i PD Lulzim Basha, i cili sipas tij u ka treguar qytetarëve kulturë perëndimore dhe tashmë nuk po e dëshmon atë duke dhënë dorëheqjen. Sipas Nishanit PD ka mbetur në 2015-ën, ndërkohë që Basha vijon të qëndrojë me këmbëngulje në krye të saj.
“Nëse merr përsipër të futesh në zgjedhje dhe merr përsipër të fitosh dhe nuk e arrin duhet të marrësh përgjegjësi. Më e pakta është që të thuash që u përpoqa, kërkon ndjesë që nuk e realizove mision dhe tërhiqesh. Ka mijëra njerëz që janë të papunë për arsye politike dhe prisnin të krijohej hapësira për ta dhe ky kontigjent është sot i traumatizuar dhe kur e shikojnë që kryetari sillet kaq lehtë fillon trysnia. Nuk them që Basha është e keqja e Shqipërisë, por është pengesë për një proces radikal. Atë që nuk bëmë më 25 prill ta bëjmë në PD. PD duhet të ringrihet, të ç’tensionohet situata paszgjedhore. Ka me qindra të rinj që mund të prodhoj PD. Unë jam i zhgënjyer sepse Basha u deklaronte qytetarëve kulturë perëndimore dhe tashmë nuk po e dëshmon. Basha vazhdon të qëndrojë me këmbëngulje në PD në atë që përfqëson sot, PD që ka mbetur në 2015-ën. Si mund të rikandidojë një njeri që ka përgjegjësinë kryesore të humbjes”, tha Nishani.