Aktualitet
Rama jep urdhrin: Operacion nga Velipoja deri në Ksamil për ndërtimet pa leje, zero tolerancë
Në aktivitetin e sotëm të organizuar për Mbrojtjen e Territorit, kryeministri Edi Rama ka dhënë një urdhër të prerë që të nisë nga operacion nga Velipoja deri në Ksamil për ndërtimet pa leje.
“Është e pamundur që një ndërhyrje në det në mes të Sarandës, të mbushet me gurë deti dhe kjo të ndodhi pa vajtur një këmbë polici për të thënë: çfarë janë këto gurë që po hidhni në det? Dhe të vijë puna te unë, dhe pas 24 orëve të pastrohet, kjo është e papranueshme. Kjo është korrupsion.
Si hidhen gurë në të gjithë bregdetin e Shqipërisë dhe nuk i shifka njeri dhe shkoka kapka një që po ndërton një avlli në Firifistun. Është e turpshme të shkojmë atje kur ndodhin gjëra këtu.
I kam kërkuar ministrit që së bashku me drejtorin e përgjithshëm, drejtorin e IKMT, ministrin e Turizmit të hartohet dhe të niset operacion nga Velipoja deri në Ksamil. Tani! Jo në mesin e verës kur të vijnë turistët. Pa asnjë tolerancë. Tani me ndryshimet ligjore penalizohet i gjithë zinxhiri.
Ata kanë 25 vjet që hanë buke atje, jo po duke shkuar aty ku është shumë e qartë fare, mjafton të hapësh sytë dhe e kupton për çfarë bëhet fjalë. Njerëzit që janë aty 25 vjet mund të vazhdojnë të bëjnë ato shërbime.
Duke shkuar për të vendosur një vijë të kuqe që s’duhet të shkelet më nga askush. Aty ku është përcaktuar vija e pakalueshme e rërës aty duhet të jetë vija. Aty ku hidhet beton pa leje aty duhet të ketë jo vetëm prishje por ndalime procese penale në bazë të ligjit dhe ndryshimeve të reja që janë bërë për këtë punë. Kini parasysh dhe diçka tjetër që tha ministrja se me ndryshimet ligjore penalizohet i gjithë zinxhiri. Ti i bën investitorit sipas dëshirës së investitorit për të ndryshuar kate e shtuar volume se shkon ti në burg.”– tha Rama.
Kryeministri paralajmëroi se të gjithë ata që kanë ndërtuar pa leje, pasi t’u prishet ndërtimi do të detyrohen të paguajnë edhe kostot e pastrimit.
“Është shumë e rëndësishme që me të gjitha ndryshime ligjore forcat të fokusohen aty ku folëm, jo për maja malesh, fshatra apo zona që është duke i thënë ‘faleminderit shumë që po rregullon murin’ e jo për t’i vënë gjobë. Shpresoj shumë që do të kalojmë në një fazë të re. Kostot janë të tmerrshme për të gjithë. Ligji është i qartë, kush e ka bërë duhet të përballojë të gjitha kostot e pastrimit. Nëse nuk e bëjnë ka pasoja të tjera.”- tha Rama.
