---

Nga Mateo Bostani

Nuk e di sa ishte ora ekzaktësisht, por sipas procesverbalit shënonte 18:55. Në Balldre, rruga Elbasan-Paper, nje polic që lëkundte tabelën bën me shenjë të ndaloj. Kërkon dokumentat, ja jap. Largohet disa metra, ku ishte postoblloku, nderkohë unë pres.

Mbaron kënga që po luhej, pas saj edhe një tjetër. Dal nga makina dhe ndez një cigare. Vras mendjen pse po vonohet. Më në fund… vjen!

Më thotë që kisha bërë shkelje të rëndë, “isha për heqje patente”, por që shefi me të cilin kishte folur u tregua zëmergjerë dhe do ndëshkohesha me një “gjobë të thjeshtë” – 16 mijë lekë nëse e paguaja për pak ditë.

-Ku ishte shkelja, e pyes.

-U fute në parakalim në kolonë, pergjigjet.

Gënjeu!

I shpjegoj që po ja fut kot: Tabela tregon 60, parakalova vetëm një makine që lëvizte ngadalë sikur do shkonte në dasmë.

-E pashë dhe unë dhe shefi, parakalove tre makina! Po t’a dija që s’ishe dakort s’ta kisha dhënë patentën, më thotë dhe zgjat dorën për te dokumentat që më riktheu pak më herët.

Me një levizje tërheq dokumentat. E shof. Do ti ktheja hakun po të telefonoja dikë më lart se Berti dhe shefi i tij, por nuk do ishte korrekte nga ana ime, edhe pse ndoshta do të qe hakmarrje e drejtë. Vendos që kam gjëra më të mira për të bërë se sa të merrem me Bertin. Firmos gjobën dhe iki.

E vërteta është se parakalova vetëm një makinë që lëvizte nën shpejtësinë maksimale të lejuar, në vija të ndërprera, rrugë të drejtë dhe fushëpamje të qartë. Nuk kishte asnjë shkelje!

Por, polic Berti dhe “shefi” i tij kishin dalë për të bërë normën…