Kryesore
Përjashtoi Berishën nga grupi Parlamentar i PD, Basha: Ka qenë vendimi më i vështirë i jetës time
Lulzim Bash theu heshtjen dhe i dha drejtim një herë e mirë dilemës pas ultimatumit të SHBA-ve për përjashtimin e ish liderit të demokratëve Sali Berisha nga grupi parlamentar të PD.
Zyrtarisht, Basha në një deklaratë për mediat, pas mbledhjes kryesinë e grupit parlamentar doli me një vendim konkret: përjashtimin e Berishës një ditë para nisjes së punimeve të Kuvendit në legjislaturën e re pas zgjedhjeve të 25 prillit, pas shpalljes së tij ‘non grata’ nga DASH.
“Për të shmangur çdo keqkuptim dhe për të konkretizuar këtë qëndrim të vetë z. Berisha, kam vendosur që deri në përfundimin e shqyrtimit të kërkesës ligjore për transparencë dhe zbardhjes së plotë të kësaj çështje në rrugë gjyqësore, z. Berisha nuk do të jetë anëtar i Grupit Parlamentar të Partisë Demokratike.
Kjo do të shmangte keqpërdorimin e çështjes nga kushdo, për të dëmtuar interesin e demokratëve dhe Partisë Demokratike, dhe do i hiqte alibinë cilitdo për të mbrojtur të keqen e vetme të Shqipërisë që është keqqeverisja dhe korrupsioni 8 vjeçar i Edi Ramës”, deklaroi Basha.
Për këtë vendim të papritur Basha tha se ka qenë vendimi më i vështirë i jetës së tij.
“Ky, ishte një nga momentet më të vështira për mua, si kryetar i Partisë Demokratike, si demokrat, si njëri prej jush, por edhe si një bashkëpunëtor i afërt prej vitesh i z. Berisha.
Ky vendim i sotëm, aspak i lehtë për mua, si në aspektin politik, por mbi të gjitha në atë njerëzor, por besoj edhe për çdo demokrat, ka si udhërrëfyes të tij, si kurdoherë, vetëm interesin e demokratëve, interesin e Partisë Demokratike, interesin e qytetarëve shqiptarë”, deklaroi Basha ndër të tjera.