Basha “vret” përfundimisht Berishën: Koha e tij ka mbaruar

Ashpërsohet “lufta” në PD. Foltorja e radhës e ish-kryetarit Berisha me të rinjtë e PD-së në Tiranë shënoi thellimin e përplasjes me ish-liderit historik të PD-së dhe kryetarit aktual. Në takimin e mbajtur me të rinjtë e FRPD-së në Amfiteatrin e Akademisë së Arteve, Berisha u tregua më i ashpër se asnjëherë tjetër me pasuesin e tij në krye të selisë blu.

Lulzim Bashën e ka kapur një frikë e tmerrshme nga anëtarët e partisë. Nga ju është tmerrësisht i pashpresë. Ju sugjeroj ta ftoni në debat dhe të mësojë nga ju ABC-në e demokracisë sepse po sillet sikur është shkolluar në Korenë e Veriut e jo në Holandë. Në këtë përpjekje kërkon mbështetjen tuaj, që ta bëjmë PD shtëpinë e lirisë për demokratët shqiptarë. Të rikthejmë votën, respektin për votën e lirë, forumet në PD, të cilat kryetari i shkelmon. Të rivendosim pavarësinë e FRPD dhe Lidhjes së Gruas, që kanë pavarësinë e pacenueshme.

Berisha përsëriti se Basha është marrë peng nga Rama dhe “merr çdo lloj vendimi që i dikton pengmarrësi”.

Një përgjigje me të njëjtat tone dhe në të njëjtën mënyrë nuk vonoi nga Basha. Në hyrje të selisë blu, ku mblodhi kryesinë e grupit parlamentar, Lulzim Basha tha se foltoret e Berishës janë zdërhallje që i japin oksigjen regjimit të Ramës. Basha theksoi se koha e paraardhësit të tij ka mbaruar dhe ai nuk mund ta përdorë partinë më për interesat e tij personale.

Koha e Sali Berishës ka mbaruar. Bashkë me të edhe koha e mandateve të sajuara dhe përdorimit të forumeve për interesa personale. Askush nuk do ta kthejë PD në bunker për interesat personale të Sali Berishës. Halli më i madh i shqiptarëve sot është regjimi i Edi Ramës. Sali Berisha me zdërhalljet e tij është kthyer në një tub oksigjeni për regjimin e Edi Ramës. Jam i vendosur ta këpus këtë tub oksigjeni.