Radar
Grenell viziton kufirin Kosovë-Serbi/ Reagon ish-presidenti Donald Trump: Të mos braktiset marrëveshja e Washingtonit, ishte historike!
Ish-presidenti amerikan, Donald Trump, ka deklaruar se nuk duhet të braktiset marrëveshja e Washingtonit Kosovë-Serbi, e arritur gjatë kohës që ai ishte shef i Shtëpisë së Bardhë.
Deklarata vjen në një ditë kur ish-i dërguari i posaçëm i SHBA-së për dialogun Kosovë-Serbi, Richard Grenell, e vizitoi kufirin në mes të dy shteteve.
Ndërkaq, Trumpi në një komunikatë për media ka thënë se “paqja është e mundshme, dhe s’duhet të ketë dorëzim për çështje.
“Popujt e mëdhenj të Serbisë dhe Kosovës kanë kapërcyer pengesa të jashtëzakonshme në ndjekjen e tyre për normalizim ekonomik. Marrëveshjet që administrata ime i ndërmjetësoi janë historike dhe nuk duhen braktisur, janë në pyetje shumë jetë. Rajoni është tepër i rëndësishëm dhe popujt kanë pritur kohë shumë të gjatë që krejt kjo punë të hidhet mënjanë. Sot, i dërguari im, ambasadori Richard Grenell, e vizitoi kufirin Kosovë-Serbi për ta nxjerrë në pah këtë marrëveshje të rëndësishme. Njëjtë sikurse kemi dëshmuar në Lindjen e Mesme me Marrëveshjet Abraham, paqja dhe normalizimi ekonomik janë të mundur, por nevojitet përpjekje e sinqertë dhe udhëheqje e palëkundur. Paqja është e mundur, mos u dorëzoni – në pyetje është prosperiteti afatgjatë i këtyre dy kombeve!” thuhet në komunikatën e Trumpit, të lëshuar nga zëdhënësi i tij.
Më 4 shtator 2020, ish-kryeministri i Kosovës, Avdullah Hoti dhe presidenti i Serbisë, Aleksandar Vuçiç, në praninë e ish-presidentit të SHBA-së, Donald Trump, firmosën marrëveshjen e Washingtonit, që është kritikuar nga kryeministri aktual Albin Kurti.