Analisti fort i njohur shqiptar, zotni Frrok Çupi, lajmëtar i gjithë të këqijave që do t’i ndodhin Sali Berishës, u ngrit sot që pa gdhirë dhe njoftoi se disponon informacione sekrete, që ish kryeministri Sali Berisha do të arrestohet nga SPAK, tri ditë përpara Kuvendit të 11 dhjetorit, pra fiks në datën tetë.

Këtë deklaratë, Frrok Çupi e bëri në prezencën e gazetarit të shquar Roland Qafoku dhe të një gazetareje edhe më të shquar, të Top News. 

Sipas Frrokut, data tetë dhjetor e gjen Sali Berishën në burg dhe në këtë mënyrë, i vetmi Kuvend demokratik, që mbetet në këmbë, është Kuvendi i Lulit, në datën 18 dhjetor. 

Pas deklaratës së Frrok Çupit për arrestimin e Sali Berishës dhe për rrjedhojë asgjësimin e tij politik, Sekretari i Përgjithshëm i PD-së, Gazment Bardhi, që e mban vulën e Lulit gjithmonë me vete, vulosi shpalljen e Frrok Çupit si delegat të datës 18 dhjetor, duke përdorur si arsyetim faktin, që Frrok Çupi, ka qenë kryeredaktori i parë i gazetës “Rilindja Demokratike” dhe i takon ky privilegj, me statutin e Lulit.

Nënvizojmë që arrestime të tilla, bënte me shumicë Enver Hoxha 50 vjet më parë, por asnjëherë nuk e lajmëronte arrestimin para kohe. 

Duke mos patur fuqi të tjera shpjeguese, ju lutemi lexoni vetë urdhërin e Frrok Çupit, mbi arrestimin e Sali Berishës, rreth datës tetë dhjetor! 

/TPZ.al/ Tej e Këtej/ 

Deklarata e Frrok Çupit

“Më 11, nëse Berisha është jashtë, nëse nuk është i ftuar nga SPAK, më 11 do të ndodhë lloji i tortës që bën Berisha.

Besoj se nga data 8 dhjetor Sali Berisha do të jetë në burg, por megjithatë presim… Mua më pyetët si një vëzhgues, si një studiues i politikës dhe si një njeri që informohet. Profesioni më ka mësuar të mos flas pa informacion.

Nëse do të ndodhë që Berisha do jetë i lirë dhe të mbledhë njerëzit, sigurisht që do t’i mbajë në këmbë, e do ti mbajë njerëzit e do t’i thotë se shiko se ne fituam, por nuk na e pranuan. Kështu e ka shtyrë gjithë jetën Berisha. Bëri një ligj përçarës për pronat, nuk u trajtuan njerëzit e persekutuar gjatë komunizmit dhe u lanë në mes të rrugës, u lanë në mes të rrugës intelektualët.

Kuvendi i 11 dhjetorit është njësoj si piramidat financiare, njerëzit do të vuajnë, e do ti thonë atij se të kam dhënë dy groshë, mi kthe tani, më ke thënë se do të bëhem ministër e tani s’më bëre…”.