Anëtarët e Komisionit të Rithemelimit, ose të njohur dhe si “Grupi i Sali Berishës”, kanë shkruar edhe sot në selinë e Partisë Demokratike, ku dhe kanë bërë një deklaratë për mediat nga selia blu dhe komunikuan vendimin e fundit që kanë marrë duke i kërkuar Lulzim Bashës që të lirojë zyrën dhe të bëjë dorëzimet deri në datë 5 Janar 2022 në të kundërt e kërcënuan se do ta nxjerrin vetë.

Të drejtuar nga Albana Vokshi, Flamur Noka, Floriana Garo drejtoreshë e komunikimit në Komisionit të Rithemelimit dhe Belind Këlliçi – deputet dhe anëtar i Komisionit të Rithemelimit, kanë komunkuar për mediat dokumentin e ratifikimit për shkarkimin e Lulzim Bashës.

Ata kanë kërkuar sërish që kreu i PD, Lulzim Basha që të lirojë selinë e PD.

“Referendumi u mbajt në 18 Dhjetor 2021 dhe rezultati i tij përfundimtar sanksionon se 43385 demokratë vendosën për shkarkimin tuaj (Lulzim Bashës) nga detyra e kryetarit të partisë. Komisioni i Rithemelimit të partisë ju fton të njiheni me vullnetin e referendumit. Kërkohet nga ana juaj të merrni masat për ta jetësuar vullnetin e demokratëve duke liruar ambientet e punës së kryetarit të partisë dhe kryer dorëzimet përkatëse deri në 5 Janar 2022. Refuzimi i vullnetit të demokratëve do të detyrojë anëtarësinë të shndërrohet në përmbaruesin politik të vullnetit të saj,”- tha Këlliçi.