Ndërsa para kryeministrisë protestohej për rritjen e çmimeve, disa metra më tutje bashkia e Tiranës organizoi një koncert të këngëtarit me famë botërore, Maluma.  

Duke u gjendur para komenteve të shumta për situatën paradoksale, kryeministri Edi Rama përgënjeshtroi se për koncertin e këngëtarit latin, të cilin e quajti “Malumja” si për të krijuar përshtypjen se nuk e njihte, nuk është paguar asnjë qindarkë nga buxheti i shtetit.

Sipas tij, Maluma kishte ardhur në Tiranë përmes një kompanie private.  

“S’është paguar asnjë lekë për koncertin e Malumes nga asnjë buxhet publik as i qeverisë as bashkisë se pyeta ca është kjo Malume. E ka sjellë këtu një kompani private e këta që dalin në protestë flasin për Malumen e ju thonë ky ka sjellë Malumen unë as e dija kush ishte Malumja”, tha Rama.

Ndërkohë, një ditë më parë edhe kryebashkiaku Erion Veliaj, duke folur prah Ramës deklaronte se Bashkia kishte vënë në dispozicion vetëm sheshin për koncertin, madje sipas tij ishin paguar edhe rreth 1.000 Euro për një foto me këngëtarin.

“Njëzetë mijë vetë në Tiranë vendosën të shkojnë në koncert. Këtë nuk e ndalon dot, se edhe një koncert i sjell vlerë qytetit. Një natë më parë, Maluma dha koncert në Paris, sot është në Londër, ose anasjelltas – pra, në dy kryeqytete të rëndësishme të Europës. Bashkia e Tiranës sigurisht që do t’ia japë sheshin për koncert sepse s’mund t’i themi se meqë 200 vetë protestojnë, do ndalojmë çdo gjë tjetër. Dje kishte njerëz që donin të dilnin për të festuar Ditën e Verës dhe dolën”, tha Veliaj.

Por, nuk zgjati shumë dhe këto deklarata u hodhën poshtë nga Uarda Koçi, një nga përfaqësueset e kompanisë që solli këngëtarin me famë botërore në Shqipëri. Ajo pranoi teksa ishte e ftuar në Top Channel se bashkia e Tiranës ka paguar 50 milionë lekë të vjetra për këtë koncert.

“Ky ishte aktivitet në bashkëpunim me Bashkinë e Tiranës. Këshilli i Kulturës, ka miratuar një fond ndihmë për…5 milionë lekë të reja. 50 milionë të vjetra,”-tha ajo, duke nxjerr blof si kryeministrin, ashtu edhe kryebashkiakun.