Lulzim Basha nuk i hyn në punë as dreqit. Këtë deklaroi Nard Ndoka, për ish-kreun e PD, teksa theksoi se tashmë është një person pa ndikim i shpallur “non-grata” nga anëtarësia e partisë.

“Edhe për SHBA, Lulzim Bashës nuk i hyn as dreqit në punë, ka humbur ndikimin. Ky është kapitull i mbyllur për opozitën. Nuk besoj se SHBA do godasin demokracinë dhe opozitën. Ky është një kapitull i turpshëm i zotit Basha, unë jam pre vetë e këtyre skemave, këto e kanë bërë tashmë Luizim Bashën një person non grata te anëtarësia. E futi PD në pikiatë, një lider që e merr partinë, një nga kryesoret në vend dhe e rendit të tretën, kjo është katastrofë, Lulzim Basha sot ka zero vota”, tha Ndoka, për MCN TV.

I pyetur për kandidaturën e mundshme të Bashës për President, Ndoka tha “Po tallet Rama me të, përtej dëshirës që mund të ketë Basha. Ai humbi karrigen me turp. Në këto momente padronët e tij e nxorën Lulin në fushë dhe i dhanë një zyrë afër PD dhe filloi lojën e Edi Ramës, për ta mbajtur peng PD dhe për të mjegulluar procesin e bashkimit”.

Sipas Ndokës, Basha është i vetmi lider opozite i përfolur për korrupsion duke e cilësuar atë një investim kolosal të kryeministrit Rama.