Ish-kryeministri Sali Berisha ka rrëfyer gabimin e tij më të madh në karrierën politike.

Në një intervistë për A2 CNN, Berisha u shpreh se gabimi i tij më i madh ishte që vendimin për t’u rikthyer në PD, nuk e mori në vitin 2017. Ish-kryeministri tregon se kur i kërkoi dorëheqjen Bashës në atë vit, ishte i bindur se ish-kryedemokrati nuk do të largohej edhe pas humbjes së zgjedhjeve.

“Gabimi më i madh i imi ishte se këtë vendim që mora në vitin 2022, duhet ta kisha marrë në vitin 2017. Sepse unë kam patur shtytje të shumta nga miq të sinqertë, të cilët nuk e bënin për karrierën e Berishës, por interesat e PD-së dhe të vendit. Kur unë i kërkova në vitin 2017 që të jepte dorëheqjen dhe më tha jo, isha i sigurt që Basha nuk do të jepte dorëheqje edhe po të humbnim zgjedhjet e radhës”, deklaroi Berisha.

I pyetur për kandidatët që do të garojnë për kreun e PD, Berisha tha se nuk ka emra të tillë. Ai pohoi se Basha është i lirë të vijojë funksionin e tij si deputet.

“Unë nuk kam emër kandidatësh, por mirëpres këdo burrë apo grua, zyrtar, deputet apo aktivist në këtë garë. Edhe Lulzim Bashën. Unë tani nuk i them më as “kukull” dhe as “bravë”, sepse ai tani nuk ka më funksione. Në rast se ai dëshiron, i ka të gjitha mundësitë për të garuar për çdo funksion apo të vijojë jetën e tij normale si deputet. Unë nuk jam njeri që veproj me mëdyshje. Ai ftesës sime i përgjigjet me Alibeajn që bën padi pa pasur tagër. Por, gradualisht uroj që (Basha) të gjejë paqen”, shtoi Berisha.