Tri pasojat pozitive të luftës në Ukrainë

Ministri i Jashtëm francez, Jean-Yves Le Drian, rendit tre pasojat pozitive që ka sjellë ndërhyrja ushtarake e Rusisë në Ukrainë. Në një intervistë për Die Welt, botuar të martën, ai u shpreh se operacioni special, siç e quan Rusia, ka sjellë si pasojë ‘zgjimin’ e BE-së, ‘ringjalljen’ e NATO-s dhe kohezionin e kombit ukrainas.

Operacioni ka shkaktuar zgjim në tre drejtime. Së pari, ai ka përforcuar kombin ukrainas. Së dyti, ka çuar në një zgjim brenda BE-së. Evropa e ka konfirmuar veten si fuqi, ka mbetur e bashkuar dhe ka dëshmuar se mund të marrë me shpejtësi edhe vendime afatgjata.

Ndërkohë, ministri i Jashtëm theksoi se kjo nuk është e njëjta Evropë që ishte para operacionit rus në Ukrainë.

Sipas Le Drian, BE-ja vendosi t’i japë fund varësisë së saj energjetike nga Rusia dhe të përforcojë mbrojtjen e saj, duke miratuar strategjinë e parë të mbrojtjes të Bashkimit – Busullën Strategjike të BE-së – dhe duke krijuar forcat e saj të reagimit të shpejtë.

“Dhe, e fundit por jo më pak e rëndësishmja: lufta ka ringjallur edhe NATO-n”, përfundoi Le Drian.