Zelensky: Nëse do të kishim armët e nevojshme, lufta do të kishte mbaruar

Presidenti ukrainas Volodymyr Zelensky në fjalimin e tij gjatë natës drejtuar vendit të tij tha se nëse Ukraina do të kishte akses në armë më të mira “të krahasueshme me ato të përdorura nga Rusia, ne tashmë do ta kishim përfunduar këtë luftë”.

Zelensky tha se “në të gjitha intervistat dhe negociatat e mia me liderët e botës demokratike, është e padrejtë që Ukraina është ende e detyruar të kërkojë atë që partnerët e saj kanë ruajtur prej vitesh“.

Ai tha se nëse këto vende kanë armët dhe municionet që u duhen Ukrainës, “është detyra e tyre morale të ndihmojnë në mbrojtjen e lirisë, për të shpëtuar jetën e mijëra ukrainasve“.

Ai shtoi më tej se nëse vendi i tij merr armët që i janë premtuar në javët e ardhshme, do të shpëtojë jetën e mijëra njerëzve.

Presidenti Zelensky shtoi se intensiteti i të shtënave ruse në Kharkiv në Donbas dhe në rajonin e Dnipropetrovsk është rritur, madje duke synuar strukturat civile.

“Fati i dhjetëra mijëra banorëve të Mariupolit që u zhvendosën në territoret e kontrolluara nga Rusia nuk dihet”, tha Zelensky.

Kjo vjen pasi ministria e mbrojtjes e Rusisë u ka lëshuar një ultimatum të ri trupave ukrainase që mbahen në qytetin e rrethuar të Mariupolit për të lënë armët.

“Forcat e armatosura ruse, të bazuara thjesht në parimet humanitare, propozojnë sërish që luftëtarët e batalioneve nacionaliste dhe mercenarët e huaj të ndërpresin operacionet e tyre ushtarake nga 1400 me orën e Moskës më 20 prill dhe të dorëzojnë armët”, tha Ministria e Mbrojtjes ruse.

Asnjë ushtar i vetëm ukrainas nuk pranoi të njëjtën ofertë të martën, tha ministria në një deklaratë.