Ish-kryeministri Sali Berisha vijon me fushatën zgjedhore në javën e zgjedhjeve për kreun e ri të PD që do të mbahet më 22 maj.

Berisha zhvilloi takim me demokratët e Lezhës, prezantoi platformën e tij si kandidat për kryetar. Berisha tha nga Lezha se demokratët arritën të krijojnë një opozitë megjithëse kishin kundër qeverinë në pushtet, ‘pseudo-opozitën’ , si edhe deklaratat e ambasadores amerikane në Tiranë, Yuri Kim.

“Kishim kundër një pseudo-opozitë që shërbehej me të gjitha mënyrat nga qeveria.

Kishim kundër ndoshta mafien më të rrezikshme ndërkombëtare, atë të Sorosit.

Censura, kërcënimet më të shumta u bënë ndaj jush.

Në këtë sistem që mbeti pa opozitë të vërtetë, në një mënyrë ose në një tjetër, jo vetëm institucionet shtetërore, por edhe mjaft nga ato privatet, silleshin me ju, sikur të ishin ndërmarrje shtetërore.

Ju kërcënonin, kërkonin të mos ndiqnit këtë lëvizje, por të gjitha këto përpjekje dështuan.

Dështoi censura dhe fushata propagandistike dhe mediatike për të dekurajuar përpjekjen tonë, dështuan sulmet e egra të qeverisë ndaj kësaj lëvizje.

Dështuan deklaratat e përsëritura të guvernatores e cila jashtë çdo parimi, marrëveshje kombëtare dhe ndërkombëtare, në çdo hap të rëndësishëm që bënim, do bënte një deklaratë për t’ju dekurajuar ju.

Kemi fituar betejën, por jo luftën.

Ju e keni konstatuar se çfarë zhurmnajë është bërë gjatë këtij procesi nga një propagandë e cila vinte sikur të ishte nga një vend diktatorial.

Nga një propagandë në një vend ku vota nuk ekzistonte, parimet e lirisë nuk ekzistonin. Vota është zemra e lirisë”, tha Berisha.