Mëlçia dhe pesha trupore

Për të humbur peshë, për të arritur një peshë të shëndetshme trupore është e nevojshme të “shkarkojmë” mëlçinë nga akumulimi i yndyrës në qelizat e saj. Tendenca e popujve të Mesdheut është abuzimi me sasinë e karbohidrateve në vaktet e tyre, të ushqimeve të bëra me miell, të cilat shkaktojnë rritje të sheqerit dhe insulinës në gjak pas çdo vakti. 70% e gjakut që shkon në mëlçi vjen nga zorrët. Tepria e karbohidrateve kthehet në glikogjen dhe acide yndyrore të ngopura në mëlçi. Ditë pas dite yndyrat depozitohen në qelizat e mëlçisë duke rritur riskun për shfaqjen e dhjamosjes së saj. 

Në një gjendje steatoze, mëlçia nuk mund ta largojë insulinën nga gjaku! Një person me dhjamosje të mëlçisë dhe nivele të larta të insulinës në gjak has vështirësi për të humbur peshë. Çdo dietë dështon. Mund të arrijë të humbasë disa kilogramë, por i rimerr menjëherë!

Në të tilla kushte e rëndësishme është kontrolli I dozës ditore të karbohidrateve glicemike, për të shmangur lipogjenezën (sintezën e acideve yndyrore). Duhet kontrolluar gjithashtu niveli i insulinës pas ngrënies dhe gjatë ditës, veçanërisht pas darkës. Nivelet e larta të insulinës në gjak shkaktojnë grumbullimin e glikogjenit dhe acideve yndyrore të ngopura në qelizat e mëlçisë.

Rekomandime dietike

Hapi I parë dhe më I rëndësishëm për të “shkarkuar” mëlçinë yndyrore: evitoni konsumin e të gjitha pijeve alkoolike.

Reduktoni ushqimet me origjinë shtazore (mish i kuq, sallamëra, pançetë, proshutë, djathëra…) duke zvogëluar dozën e acideve yndyrore të ngopura.

 Zgjidhni të paktën tre porcione peshku në javë, për të siguruar omega 3, EPA, DHA, vitaminë D.

Shtoni ushqimet e freskëta, të stinës me origjinë bimore, zgjidhni drithëra me miell integral, midis bishtajoreve zgjidhni: thjerrëzat, qiqrat, bizelet, soja, fasulet…

Mos tejkaloni sasinë e frutave. Rekomandohet konsumi I dy frutave në ditë sepse në kushtet e steatozës fruktoza e frutave shndërrohet shpejt në acide yndyrore të ngopura.

Ushqimi vegjetarian ose vegan është një zgjedhje e shkëlqyer për pacientët me steatozë, por kini shumë kujdes që të mos tejkaloni dozën ditore të karbohidrateve glicemike dhe acideve yndyrore të ngopura.