Ivana Trump, ish-bashkëshortja e ish-presidentit Donald Trump, ka vdekur në moshën 73-vjeçare. Lajmin e kanë bërë të ditur vetë familjarët. “Nëna jonë ishte një grua e jashtëzakonshme, një biznesmene e fuqishme, një atlete e klasit botëror, një bukuri rrezatuese dhe nënë dhe mike e kujdesshme”, tha familja Trump në një deklaratë.

Ivana Trump ishte një e mbijetuar. Ajo iku nga komunizmi dhe përqafoi këtë vend. Ajo i mësoi fëmijët e saj për guximin dhe ashpërsinë, dhembshurinë dhe vendosmërinë. Ajo do t’i mungojë shumë tre fëmijëve dhe dhjetë nipërve e mbesave të saj,” u shpreh më tej familja.

Edhe ish bashkëshorti dhe ish-presidenti Trump ka bërë një mesazh për Ivanën: “E kujtoj Ivanën si një grua të mrekullueshme, të bukur dhe të mahnitshme, e cila bëri një jetë të mrekullueshme dhe frymëzuese. Krenaria dhe gëzimi i saj ishin tre fëmijët e saj, Donald Jr., Ivanka dhe Eric. Ajo ishte aq krenare për ta, ashtu siç ishim të gjithë aq krenarë për të,” ka shkruar ai.

Ivana Trump ishte gruaja e parë e Donald Trump. Ata kishin tre fëmijë së bashku: Donald Jr., Ivanka dhe Eric Trump.

Ivana Trump, e cila u rrit nën sundimin komunist në ish-Çekosllovaki, u martua me Donald Trump në vitin 1977. Çifti u divorcua në 1992.