Profesori Susaj: Në diktaturë ishim, në diktaturë jemi! Mora borxh dhe e nisa jashtë djalin e vetëm!

Profesori Susaj: Në diktaturë ishim, në diktaturë jemi! Mora borxh dhe e nisa jashtë djalin e vetëm!

Në bashkëbisedimin që Kryetari i PD-së, Sali Berisha pati dje me intelektualë të pavarur në Tiranë për situatën ku ndodhet sot Shqipëria, ka tërhequr vëmendjen fjala e z. Lush Susaj, profesor në Universitetin Bujqësor të Tiranës dhe publicist i njohur.

Prof. Susaj, që ka përballë tij një brez të ri që në vazhdimësi po largohet nga vendi, ka qenë tejet konkret në prekjen e kësaj teme të dhimbshme: ai nuk ka folur si pedagog më shumë sesa si baba, si një ndër ata mijëra baballarë në qytete apo ata zonat më të thella të vendit, që janë detyruar të përcjellin jashtë vendit fëmijët e tyre.

“Unë mendoj se për fat të mirë, duke besuar në Zot dhe në shpirtin e kombit tonë, pas 110 vjetësh, shqiptarëve po u vjen dita që të përballen me veten e tyre, me të mirat dhe me të këqijat, dhe nga kjo përballje unë jam shumë i sigurt që më në fund do të ketë dritë për të jetuar me fëmijët tanë edhe ne, në këtë vend.

Problemi është shumë më i thellë, me ato njohuri që kam unë dhe me ato që njoh këtu në Shqipëri dhe në botë ku kam studiuar e kam punuar.

Unë mendoj se populli jashtë është shumë më lart intelektualisht sesa politika e tij dhe shumë më i bashkuar. Ndihem mirë dhe shoh që ka një debat të sinqertë për herë të parë me popullin dhe gradualisht, çdo ditë po i thuhet popullit: Në një diktaturë ishim, në diktaturë jemi!

Kurrë në Shqipëri në këto 110 vjet nuk u lejuan që të piqen frutat e demokracisë dhe për pasojë jemi në këtë gjendje!”

Më tej, prof. Susaj preku dhimbjen e tij: “Nuk e kam larguar djalin për qejf. Kam një djalë të vetëm. Kam marrë 12 mijë paund borxh dhe e kam dërguar djalin jashtë vetëm për të mos ua lënë mish për top, oficerëve të Policisë në Tiranë.

Askujt mos t’i shkojë mendja se fëmijën e vetëm, djalin e vetëm, e nxjerr nga shtëpia prej qejfit. Por djali im nuk vjen më, me ia shtru me flori këtu e në Athinë e në Londër dhe pa bukë jeton atje! Sepse, e kam parë çfarë vuan këtu! Djali im ishte aktivist dhe anëtar i Partisë Demokratike. Dhe kjo ka ndodhur me të gjithë fëmijët e shqiptarëve.

Ne e kemi dëbuar rininë, ne e kemi masakruar rininë, nuk u bëmë kurrë pjesë e zgjidhjes së halleve të tyre!…”.