Partia Demokratike vijon me nxjerrjen e fakteve të reja dhe pyetjeve drejtuar autoriteteve përgjegjëse lidhur me aferën e inceneratorëve.

Deputeti demokrat Luan Baçi në një deklaratë nga inceneratori i Fierit tha se mes Ministrisë së Mjedisit dhe kompanisë Integrated “Technology Waste Management” është nënshkruar një kontratë në tetor të vitit 2016 me vlerë 30 milionë euro.

Baçi ngre 5 pyetje për qeverinë. Së pari, VKM-ja me të cilën janë dhënë 30 milionë eurot që sipas tij ose nuk ekziston një e tillë ose mbahet e fshehtë. Së dyti, Baçi deklaroi se kontrata nuk është botuar në Fletoren Zyrtare.

Deputeti përmend auditimin e KLSH-së para tre vitesh që sipas të cilit rezultoi se ishin marrë 88% e fondit për inceneratorin e Fierit por nuk ishin investuar as 12%.

Deklaratë e deputetit të Partisë Demokratike, Luan Baçi

Një kontratë koncensionare është lidhur mes ministrisë së Mjedisit dhe kompanisë Integrated “Technology Ëaste Management” që në tetor 2016. Vlera e kontratës është 30 milion euro.

Partia Demokratike, opozita dhe aktorë të ndryshëm të shoqërisë civile e kanë denoncuar pa ndërprerje atë koncension që u kthye në mega-aferë. Thuajse 6 vjet më vonë ende ka shumë pyetje, por asnjë dilemë. Pronarët e inceneratorëve janë në kërkim, ndërkohë që produktet e veprës penale nuk bllokohen.

Përgjigjet duhen kërkuar te mëkati apo korrupsioni fillestar. Që në firmosjen e kontratës mes ministrisë së Mjedisit dhe kompanisë së Klodian Zotos ka shumë gjëra që “mbajnë erë”. Kompanitë e djegies së mbetjeve, që u krijuan për ta zhdukur erën e keqe nga qytetet, bënë të kundërtën, e shtuan atë. Duke shtuar, bashkë me erën, edhe kostot të cilat llogariten në kufijtë e 500 milion eurove.

Sot, si çdo ditë, kemi këto pyetje të thjeshta për SPAK:

1. Pse nuk ka një VKM për 30 milion eurot e inceneratorit të Fierit, apo ka nje te tille dhe mbahet i fshehur?

2. Pse kjo kontratë 30 milion euroshe nuk është botuar fare në Fletoren Zyrtare?

3. Kush kishte tagrin që të injoronte vendimin e Fierit dhe ta ndërtonte krejt tjetërkund nga 10 vendosjet e vlerësuara nga Bashkia e Fierit?

4. Para 3 vitesh KLSh njoftoi se ishin marrë 88% te fondit për inceneratorin e Fierit por nuk ishin investuar as 12%! Ku shkuan ato para?

5. Pse nuk ndërpritet kontrata dhe të dërgohet për ndjekje penale?

Këto janë pyetjet dhe secili i formulon vetë përgjigjet. Por, deveja nuk futet në thes. Thesi nuk bëhet dot llogari në offshore dhe, sado të vonojë koha, një ditë vjedhësit që e varin xhaketën te firma e Edi Ramës dhe sejmenëve të tij do të japin llogari.