Sa orë jeton njeriu?

Nga Artan Fuga

Seneka : Sa orë jeton njeriu?

Nuk e kuptuan ata që jepen pas pasurisë pa meritë, korrupsionit, shpërdorimeve duke kujtuar se e fitojnë jetën kështu?

Ja çfarë thotë Seneka, ky filozof romak nja 20 shekuj më parë: Mos kujtoni se të jetosh gjatë ke jetuar shumë!

Në fakt mund të kesh jetuar vetëm disa ditë! Kthehuni pas dhe rikujtoni ditët që mbani mend!

Pjesa dërmuese e tyre janë fshirë nga kujtesa!

Sepse nuk janë jetuar si duhet!

Kanë qenë harxhim i kotë orësh, dhënë pas sherresh të kota, ambicjesh pa kurrferë vlere, qendrimesh dembele pa bërë asgjë, sharjesh dhe mundimesh që nuk kanë pasur asnjë vlerë, rutinë e gjallë!

Ditët që kujtohen më vonë, ato kanë qenë ditë të jetuara.

Mundet që edhe një njëqindvjeçar të ketë jetuar vetëm disa ditë ose orë në fakt!

Përpiqet dikush të zgjasë jetën, por në fakt e humbet sepse e harxhon kohën e tij kot!

Koha që ikën nuk kthehet pas.

Ka njerëz që poqese u kërkon parà nuk të japin, por poqese dikush u propozon ta harxhojnë kot jetën e tyre, e bëjnë pa qeder!

Harxhojnë gjënë e tyre më të shtrenjtë pa llogari, kujtojnë se do të jetojnë pa fund!

Këtë Seneka e trajton te libri i tij monumental : Mbi shkurtësinë e jetës! Pra, sipas tij ka njerëz që luftojnë për ideale të kota, për vlera të rreme!

Ata mund të marrin pa fund vite frymë, por mund të mos kenë jetuar fare!

Mos ngurroni thotë filozofi stoik romak të, ktheni kokën pas çdo çast dhe të shihni se cilët ditë dhe vepra mbani mend nga jeta.

Ato çaste quhen të jetuara, të tjerat janë pluhur iluzionesh!